ဆယ်ကျော်သက်တွေ ဘာတွေအဓိကစားသင့်လဲ

          အာဟာရဆိုတာ အသက်အရွယ်မရွေးနဲ့ ဆိုင်တယ်ဆိုတာ လူတိုင်း သိထားပြီးသားဖြစ်တယ်ဆိုပေမယ့် ဘယ်အသက်အရွယ်မှာ ဘယ်လိုအာဟာရဓာတ်တွေ အဓိကလိုနေတယ်ဆိုတာကို သေချာသိရင် ကလေးတွေ ကြီးထွားဖွံ့ဖြိုးအောင် ပြုစုပျိုးထောင်ရတာ ပိုအဆင်ပြေပါတယ်။

          အထူးသဖြင့် ကလေးငယ်မွေးစကနေ ကြီးထွားဖွံ့ဖြိုးအောင် ဂရုတစိုက်ကျွေးဖြစ်ကြပေမယ့် ဆယ်ကျော်သက် (၁၀ နှစ်မှ ၁၉ နှစ်အထိ)အရွယ်ရောက်ရင် မိဘတွေက သေချာဂရုပြုပြီး မကျွေးဖြစ်တတ်ကြတာလေးတွေ တွေ့ရပါတယ်။

          ငယ်ငယ်က သေချာမစားမိလို့ လူကောင်သေးနေတယ်၊ ညှက်နေတယ်ဆိုရင် ဆယ်ကျော်သက်အရွယ်မှာ ကောင်းကောင်းကျွေးပြီး ကြီးထွားဖွံ့ဖြိုးအောင် လုပ်လို့ရပါသေးတယ်။ ဒီဆယ်ကျော်သက်အရွယ်ကို ကျော်သွားမယ်ဆိုရင်တော့ ထပ်ပြီး ကြီးထွားဖို့လုပ်ဖို့က ခက်သွားတတ်ပါတယ်။ ဥပမာ အရပ်အမောင်းလိုမျိုးပါ။

ဆယ်ကျော်သက်အရွယ်မှာ ဘာတွေစားဖို့လိုသလဲ

          သံဓာတ်ကြွယ်ဝတဲ့ အစားအစာတွေ စားဖို့လိုပါတယ်။ ကျွန်တော်တို့ မြန်မာနိုင်ငံမှာ အသားစားနှုန်းက အရမ်းနည်းပါတယ်။ ထမင်းကိုအဓိကအခြေခံပြီး စားနေတဲ့အတွက် စားလိုက်တဲ့အသားပမာဏက တကယ့်ကို လိုအပ်ချက်နဲ့တွက်ကြည့်ရင် ကိုက်ညီမှု မရှိပါဘူး။ အင်မတန်နည်းနေတဲ့ အခြေအနေမျိုးပါ။ အဲဒါအပြင် သံဓာတ်ချို့တဲ့စေတဲ့ အစားအစာတွေဖြစ်တဲ့ လက်ဖက်၊ လက်ဖက်ရည်၊ နို့လက်ဖက်ရည်၊ စတာတွေ အစားများရင်လည်း သံဓာတ်စုပ်ယူမှုကို လျော့နည်းစေပြီး သံဓာတ်ချို့တဲ့ကာ သွေးအားနည်းရောဂါကို ဖြစ်စေနိုင်ပါတယ်။ အထူးသဖြင့် မိန်းကလေးတွေမှာဆိုရင် ဓမ္မတာကြောင့် သွေးဆုံးရှုံးမှုတွေ ဖြစ်တဲ့လအတွက် သံဓာတ်ပိုချို့တဲ့နိုင်တာကြောင့် လူငယ်တွေအကြိုက်ဖြစ်တဲ့ လက်ဖက်တို့ နို့လက်ဖက်ရည်တို့ကို လျှော့သောက်၊ လျှော့စားပေးသင့်ပါတယ်။ နောက်ပြီး သံဓာတ်ကြွယ်ဝတဲ့ အစားအစာတွေ စားပေးဖို့လည်း လိုအပ်ပါတယ်။ ဥပမာ -

-       ဝက်သား

-       အမဲသား

-       ဆိတ်သား စတဲ့ အနီရောင်ရှိတဲ့အသားတွေ တစ်ပတ်နှစ်ကြိမ်၊

-       အဖြူရောင်အသားတွေဖြစ်တဲ့ ကြက်သား၊ ငါး

-       ပဲအမျိုးမျိုး

-       ကြက်ဥ

-       ကြက်အသည်း

-       ဟင်းနုနယ်၊ ကန်စွန်းရွက် စတာတွေကို စားပေးသင့်ပါတယ်။

နောက်ထပ် အရေးကြီးတာကတော့ အခုဖော်ပြထားတဲ့ သံဓာတ်ကြွယ်ဝတဲ့ အစားအစာတွေကိုစားရင် သံဓာတ်စုပ်ယူမှု အားကောင်းစေတဲ့ ဗီတာမင်စီ ကြွယ်ဝတဲ့ အစားအစာတွေနဲ့ ရောစားသင့်ပါတယ်။ ဥပမာ - ကင်ပွန်းချဉ်ရွက်ဟင်းချို၊ ချဉ်ပေါင်ဟင်း၊ သံပရာသီး၊ ဆန်းကစ်သီး၊ ရှောက်ချိုသီး၊ လိမ္မော်သီး၊ ငရုတ်ပွ၊ မာလကာသီး၊ ကျွဲကောသီး၊ နာနတ်သီး စတာတွေနဲ့ တွဲစားပေးသင့်ပါတယ်။

          အသားဓာတ်ပြည့်အောင် ကျွေးပေးရပါမယ်။ မိဘတွေအနေနဲ့ ကလေးငယ်ကို အသက်ရလာတဲ့အခါမှ ညှက်မနေအောင်၊ လူကောင်သေးမနေအောင် ငယ်စဉ်အရွယ်တည်းက အသားဓာတ်ပြည့်ဝအောင် ကျွေးပေးဖို့လိုပါတယ်။ ဘယ်လောက်စားပေးသင့်သလဲဆိုရင်တော့ ၁၀ ကျပ်သားလောက် အနည်းဆုံး စားပေးသင့်ပါတယ်။ အသားကျွေးရခက်တဲ့ ကလေးတွေဆိုရင် နွားနို့၊ ကြက်ဥ၊ ပဲအမျိုးမျိုး စတာတွေကိုလည်း ကျွေးလို့ရပါတယ်။ ဒါမှ အရပ်ရှည်ပြီး လူကောင်ထွားလာမှာ ဖြစ်ပါတယ်။

          ကောင်းတဲ့အဆီတွေပါတဲ့ အစားအစာကျွေးပါ။ ကောင်းတဲ့အဆီဆိုတာ မပြည့်ဝဆီ (Unsaturated Fat) တွေ ကြွယ်ဝတဲ့ အစားအစာတွေကို အသင့်အတင့် စားပေးဖို့ လိုအပ်ပါတယ်။ ဥပမာ - ဆော်လမွန်ငါး၊ တူနာငါး၊ ဆာဒင်းငါး၊ ငါးမြင်း၊ ငါးတန်တွေအပြင် သီဟိုဋ္ဌ်စေ့၊ ဗာဒံစေ့၊ နေကြာစေ့၊ မြေပဲ(လက်တစ်ဆုပ်စာ) လောက် ကျွေးပေးလို့ရပါတယ်။

          ကြက်ဥတစ်လုံးကျွေးပေးပါ။ ကြက်ဥမှာပါဝင်တဲ့ ကိုလင်း (Choline) ဓာတ်က မှတ်ဉာဏ်စွမ်းအားကို ပိုကောင်းစေတဲ့အတွက် ကျောင်းသား၊ ကျောင်းသူအရွယ်လေးတွေအတွက် ပိုအသုံးဝင်တယ်လို့ ဆိုနိုင်ပါတယ်။

          နွားနို့ တစ်နေ့တစ်ခွက် အနည်းဆုံးသောက်သင့်ပါတယ်။ ကလေးငယ်တွေ အရိုးအဆစ်တွေ သန်မာလာစေပြီး အရပ်ရှည်စေဖို့အတွက် အဓိကလိုအပ်တဲ့ ကယ်လ်စီယမ်ထုံးဓာတ်ကို နွားနို့က အဓိကရတဲ့အတွက် တစ်နေ့တစ်ခွက် 200 ml လောက် သောက်သင့်ပါတယ်။

          ဆယ်ကျော်သက်တွေမှာ ဝမ်းချုပ်တဲ့ပြဿနာကလည်း တော်တော်လေးများလာတာ သတိထားမိလာပါတယ်။ ဒါကြောင့် အမျှင်ဓာတ်များတဲ့ အစားအစာတွေဖြစ်တဲ့ အသီးအနှံ၊ ဟင်းသီးဟင်းရွက်တွေ များများစားပေးဖို့ လိုပါတယ်။ ဥပမာ - အသီးတစ်နေ့တစ်လုံး၊ အရွက်တစ်နေ့ တရုတ်ပန်းကန်လုံး နှစ်လုံးလောက် ကျွေးသင့်ပါတယ်။

          ဒီလောက်ဆိုရင် ကိုယ့်ကလေးက ညှက်နေသေးတယ် ငယ်ငယ်က သေသေချာချာ စနစ်တကျမကျွေးဖြစ်လိုက်ဘူးဆိုရင် ဒီဆယ်ကျော်သက်အရွယ်က ဒုတိယအခွင့်အရေးဖြစ်တဲ့အတွက် မမေ့မလျော့ပဲ သေချာသတိထား ကျွေးမွေးပြုစုစောင့်ရှောက်ပေးဖို့ တိုက်တွန်းလိုက်ပါတယ်။

Credit : ဒေါက်တာ ညီညီကျော်