ကိုယ်ဝန်ဆောင်ကာလမှာ သက်သောင့်သက်သာဖြစ်အောင် ဘယ်လိုနေကြမလဲ

ကိုယ်ဝန်ဆောင်ကာလအတွင်းမှာ သိပ်ပြီး မပြင်းထန်လွန်းတဲ့ လှုပ်ရှားမှု (သို့) လေ့ကျင့်ခန်းတစ်မျိုးမျိုး ပြုလုပ်ပေးတာမျိုးက ကလေးမွေးဖွားချိန်မှာ မွေးဖွားရလွယ်ကူတဲ့ ရလဒ်ကို ရရှိစေပါတယ်။ ဒါကြောင့်မို့ ယနေ့ မျက်မှောက်ခေတ် သားဖွားမီးယပ် ကျွမ်းကျင်ပညာရှင်တွေနဲ့ သူနာပြုတွေက သူတို့ရဲ့ ကိုယ်ဝန်ဆောင်လူနာတွေကို လမ်းလျှောက်တာ စတဲ့ အပြုအမူမျိုးကို လုပ်ပေးကြဖို့ အကြံပေးကြတာပဲ ဖြစ်ပါတယ်။ ဒါပေမဲ့ တစ်ခုသတိပြုရမှာက ဒီလိုကာလ လေ့ကျင့်ခန်းပြုလုပ်ရာမှာ သာမန်အချိန်တွေမှာလို (ဥပမာ - လေးချိန်ကျစေအောင်) အပြင်းအထန်ပြုလုပ်ဖို့ လုံးဝ မလိုအပ်ဘူးဆိုတဲ့ အချက်တစ်ချက်ပါပဲ။ နဂို လေ့ကျင့်ခန်းပြုလုပ်တတ်တဲ့ အလေ့အထရှိသူတွေအနေနဲ့ ကိုယ်ဝန်ရှိလာပါရင်လည်း ဆက်လက်ပြုလုပ်ပေးနိုင်ပါတယ်။

လေ့ကျင့်ခန်းနဲ့ ပတ်သက်တဲ့ အချက်အလက်တွေ 

နံပါတ် -၁

 ပထမဦးဆုံး အချက်တစ်ချက်အနေနဲ့ ပြောရရင် ကိုယ်ဝန်ဆောင်ကာလ လေ့ကျင့်ခန်းပြုလုပ်တဲ့အခါ စတင်မပြုလုပ်မှ မိမိရဲ့ သားဖွားမီးယပ်ဆရာဝန်နဲ့ အရင်တိုင်ပင်ဖို့လိုပါတယ်။

နံပါတ် -၂

 နံပါတ် ၂ အနေနဲ့ကတော့ လေ့ကျင့်ခန်းလု်နေတုန်း အောက်ဖော်ပြပါ လက္ခဏာရပ်တွေထဲက တစ်မျိုးမျိုးဖြစ်လာခဲ့မယ်ဆိုရင် ဆက်လက်ပြုလုပ်မနေတော့ဘဲ ဆရာဝန်ထံ ချက်ချင်းပြသပေးဖို့ လိုအပ်တယ်။

လက္ခဏာရပ်တွေကတော့ -

၁။ ရင်ဘတ် (သို့) ကျောအောင့်ခြင်း

၂။ လမ်းလျှောက်ရာမှာ မသွက်တော့ခြင်း

၃။ မူးဝေခြင်း

၄။ နှလုံးခုန်မမှန်ခြင်း

၅။ ဆီးစပ်နေရာမှာ နာလာခြင်း

၆။ သာအိမ်နေရာ၌ ဆွဲညှစ်လိုက်သလိုခံစားရခြင်း

၇။ မွေးလမ်းကြောင်းမှ သွေးဆင်းခြင်း

၈။ အသက်ရှူရခက်ခဲခြင်း စတာတွေပါပဲ။

နံပါတ် - ၃

 နံပါတ် - ၃ ကတော့ လေ့ကျင့်ခန်း မပြုလုပ်မီ ပြုလုပ်နေတုန်းနဲ့ ပြုလုပ်ပြီးကာလတိုင်းမှာ ရေကိုသောက်သုံးပေးဖို့ လိုအပ်ပါတယ်။ ဒါမှသာ ခန္ဓာကိုယ်အပူချိန် ပုံမှန်ဖြစ်အောင် ထိန်းနိုင်မှာဖြစ်ပြီး ရေဓာတ်ခန်းခြောက်ခြင်းကိုပါ လျော့ကျစေနိုင်မှာပဲ ဖြစ်ပါတယ်။

နံပါတ် -၄ 

 ကလေးမွေးဖွားတဲ့အချိန်မှာ ခြေထောက်ကြွက်သား၊ ဆီးခုံနေရာရှိ ကြွက်သား စတာတွေကို မဖြစ်မနေ အသုံးပြုရပါတယ်။ အဲဒီအတွက် အဆိုပါနေရာမှာရှိတဲ့ ကြွက်သားတွေသန်မာဖို့ လေးပေါင်ကနေ ၁၀ ပေါင်အလေးချိန်ရှိတဲ့ အလေးဘက်ကနေ ဆွဲမပေးဖို့ လိုအပ်ပါတယ်။

နံပါတ်  - ၅

 နံပါတ် - ၅ ကတော့ ခန္ဓာကိုယ် ပြင်းပြင်းထန်ထန် ရွေ့လျားပြီး လေ့ကျင့်ခန်းပြုလုပ်ပေးတာက ကြွက်သားနေရာတွေနဲ့ အရိုးအဆစ်နေရာတွေမှာ အနာတရဖြစ်ပြီး နာကျင်လာနိုင်တဲ့အတွက် ရှောင်ကြဉ်ဖို့ အထူးလိုအပ်ပါတယ် ဆိုတာပါပဲ။

နံပါတ် - ၆ 

 နံပါတ် - ၆ အနေနဲ့ ပြောရမယ်ဆိုရင် လမ်းလျှောက်ခြင်းက အန္တရာယ်အကင်းဆုံးနှင့် စိတ်အချရဆုံး လေ့ကျင့်ခန်းတစ်ခုပါပဲ။ ဒီလိုလမ်းလျှောက်နေတုန်းမှာလည်း သက်သောင့်သက်သာဖြစ်စေမယ့် အတွင်းခံတွေ၊ ဖိနပ်တွေ အသုံးပြုပေးဖို့ လိုအပ်ပါသေးတယ်။ ပြုလုပ်နိုင်တဲ့ အခြားလေ့ကျင့်ခန်းတွေကတော့ ရေကူးတာ၊ စက်နှင့်စက်ဘီးစီးတာအပြင် ပေါ့ပါးတဲ့ အေရိုးဗစ်လေ့ကျင့်ခန်းတို့ပါပဲ။ ဒီလို လေ့ကျင့်ခန်းမျိုးကို တစ်ပတ်ကို တစ်ကြိမ်လောက် အနည်းဆုံးထားပြီး ပြုလုပ်ပေးမယ်ဆိုရင် ကိုယ်ဝန်ကြောင့် ခါးနာတာ၊ ခန္ဓာကိုယ်ဖောရောင်တာ စတဲ့ မလိုလားအပ်တဲ့ လက္ခဏာရပ်တွေကို ကာကွယ်နိုင်ပါလိမ့်မယ်။ ဒါ့အပြင် ကိုယ်ဝန်ဆောင်ကာလတွေမှာ လေ့ကျင့်ခန်းပြုလုပ်ပေးတာက စိတ်ပိုင်းဆိုင်ရာ အခြေအနေတွေကို တိုးတက်ကောင်းမွန်စေရုံသာမကဘဲ မွေးဖွားတဲ့အချိန်မှာလည်း မြန်မြန်ဆန်ဆန်နဲ့ လွယ်လွယ်ကူကူ မွေးဖွားနိုင်မှာပဲ ဖြစ်ပါတယ်။ 

နံပါတ် - ၇

 သက်ဆိုင်ရာ ဆရာဝန်ညွှန်ကြားတဲ့ လေ့ကျင့်ခန်းကို ဖြစ်နိုင်ရင် အစောနိုင်ဆုံး ပြုလုပ်ပေးသင့်ပါတယ်။ ဒီလိုပြုလုပ်ပေးရင်ဖြင့် ကိုယ်ဝန် ပထမသုံးလအတွင်းမှာ ခံစားရတဲ့ ပင်ပန်းနွမ်းနယ်မှုတွေ၊ ပျို့ချင်အန်ချင်တာတွေ ခံနိုင်ရည်ရှိလာပါလိမ့်မယ်။ ကိုယ်ဝန်ရဲ့ အလေးချိန်ကြောင့် သွေးကြောတွေအတွင်း သွေးလည်ပတ်မှု ကောင်းမွန်ရအောင် ပက်လက်အနေအထားနဲ့ ပြုလုပ်တဲ့လေ့ကျင့်ခန်းမျိုးကိုတော့ လုံးဝ မပြုလုပ်မိပါစေနဲ့။ တစ်ဆက်တည်း အကြာကြီး မတ်တတ်ရပ်နေတဲ့ လေ့ကျင့်ခန်းမျိုးကလည်း ခြေထောက်တွေကို ဖောရောင်လာစေနိုင်ပါတယ်။

နံပါတ် - ၈

 နံပါတ် - ၈ အချက်အနေနဲ့ ပြောလိုတာကတော့ လေ့ကျင့်ခန်းပြုလုပ်နေစဉ်တုန်းမှာ မူးဝေ သို့မဟုတ် ပျို့အန်တာမျိုး ဖြစ်ခဲ့ရင် အနားယူဖို့ လိုအပ်ပါလိမ့်မယ်။

နံပါတ် - ၉ 

 ကိုယ်ဝန်ဆောင်တစ်ဦး တစ်နေ့လိုအပ်တဲ့ ကယ်လိုရီက ၁၆၀ ထက် ပိုမိုလိုအပ်တဲ့အတွက် အစာအုပ်စုအားလုံးကို သင့်တော်သလို စားပေးဖို့လိုအပ်ပါတယ်။ ရေကိုလည်း ဂရုတစိုက် သောက်ပေးရပါလိမ့်မယ်။

ဒီလိုအခြေအနေမျိုးမှာ လေ့ကျင့်ခန်း မပြုလုပ်ပါနဲ့

• ကိုယ်ဝန်ဆောင်ထားစဉ်မှာ သွေးပေါင်ချိန် မြင့်နေခြင်း

• သားအိမ်အတွင်းမှာ သန္ဓေသားဖွံ့ဖြိုးသင့်သလောက် မဖွံ့ဖြိုးခြင်း (ဖွံ့ဖြိုးမှုနောက်ကျခြင်း)

• သွေးဆင်းနေခြင်း

• သားအိမ်လည်တံနေရာ နဂိုအတိုင်းမဟုတ်ခြင်း၊ သားပျက်သားလျှောဖြစ်ဖူးခြင်း

• နှလုံးနဲ့ ပတ်သက်တဲ့ ရောဂါတစ်စုံတစ်ရာရှိခြင်း စတာမျိုးတွေမှာ လေ့ကျင့်ခန်းပြုလုပ်ဖို့ မသင့်ပါဘူး။

Credit: ဒေါက်တာ ခင်ဝတ်မှုန်