စိတ်ဖိစီးလွန်းခြင်းကြောင့် ဒုက္ခရောက်ရမည့်(၇) ချက်

စိတ်ဖိစီးခြင်းမှာလည်း အကျိုးရလဒ်တွေ ရှိသည်ဟု က၊ွမ်းကျင်သူ အများစု လက်ခံထားသည်။ ကိစ္စတစ်ခုခု အတွက် စိတ်ဖိစီးနေသည့်အခါ လူသည် ထိုကိစ္စကို ပိုအာရုံစိုက်ဖြစ်သည်။ ပိုပြီးလည်း နိုးနိုးကြားကြား ရှိနေတတ်သည်။ မည်သည့် အရာမဆို တန်ဆေး လွန်ဘေးဖြစ်သည်။ အသင့်အတင့်သော စိတ်ဖိစီးမှုသည် စိတ်အာရုံကို စူးစိုက်ကာ စွဲစွဲမြဲမြဲ လုပ်ဖြစ်အောင် ဖန်တီးပေးနိုင်သော်လည်း စိတ်ဖိစီးမှု သိပ်များသွားလျှင်မူကား စားသောက်မှု ပုံစံကအစ လူမှုဆက်ဆံရေးထိပါ ထိခိုက်နိုင်သည်။

ရေတိုရေရှည် စိတ်ဖိစီးမှုတွေကြောင့် နေစဉ်ဘဝကိုပါ ထိခိုက်ရသည့် အချက် (၇) ချက်ကို အောက်တွင် ဖော်ပြပါမည်။

၁။ ဆုံးဖြတ်ချက် အလွဲတွေ ပိုချဖြစ်စေသည်။

သေချာစဉ်းစား ဆုံးဖြတ်သင့်သည့် ကိစ္စမျိုးကို စိတ်ဖိစီးနေချိန်မျိုးတွင် မဆုံးဖြတ်ပါနှင့်ဟု လူမှုစိတ်ပညာ ကျွမ်းကျင်ပညာရှင်များက အကြံပြုသည်။ စိတ်ဖိစီးနေသည့် အခါ မိမိစိတ်သန်ရာဘက်ကို ဆွဲပြီး ဆုံးဖြတ်မိတတ်သည်။ မိမိက ထိုအချိန်တွင် အကောင်းဘက်ကို စိတ်သန်နေသည် ဆိုလျှင် မိမိဆုံးဖြတ်ရမည့် ကိစ္စကိုလည်း အကောင်းချည်း စွတ်မြင်ကာ ထိုအတိုင်း ဆုံးဖြတ်လိုက်တတ်သည်။ မိမိက အဆိုးဘက်ကို စိတ်သန်နေချိန် ဆိုပါကလည်း မိမိဆုံးဖြတ်ရမည့် ကိစ္စကို အဆိုးချည်း စွတ်မြင်ကာ အဆိုးကဲသော ဆုံးဖြတ်ချက်မျိုး ချမိတတ်သည်။ သို့ဖြစ်ရာ စိတ်တည်ငြိမ်နေသော အခါမျိုးမှသာ အကောင်းရော အဆိုးကိုပါ သေချာချိန်ဆပြီး ဆုံးဖြတ်သင့်သည်။

၂။ ပေါင်းလို့သင်းလို့ မကောင်းသူ ဖြစ်နေလိမ့်မည်။

အလွန်အကျွံ စိတ်ဖိစီးနေသည့်အခါ ကိုယ့်ကိစ္စလောက်သာ အာရုံစိုက် ဖြစ်နေမည်။ဘေးဝန်းကျင်ကို အာရုံစိုက်ဖို့ စိတ်မရှည်တော့။ ဘေးဘီက လူများသည် ကိုယ့်အတွက်ဒေါသဖြစ်စရာ၊ စိတ်မရှည်စရာများချည်း ဖြစ်နေလိမ့်မည်။ ထိုသို့ ဖြစ်ရသည်မှာလည်း ကိုယ့်စိတ်မထားတတ်ရုံ တစ်ခုတည်းကြောင့်တော့ မဟုတ်။ ကြွက်များနဲ့ လေ့လာမှုတွင် အလွန်အကျွံ စိတ်ဖိစီးလာသော ကြွက်များ၏ ဦးနှောက်ထဲကနေ အင်ဇိုင်းတစ်မျိုး ထွက်လာသည်။ ထိုအင်ဇိုင်းသည် ပေါင်းသင်း ဆက်ဆံနိုင်စွမ်းကို ကျဆင်းစေသည့် အင်ဇိုင်းဖြစ်ကြောင်း တွေ့ခဲ့ရသည်။

၃။ အလုပ်ပြီးမြောက်ဖို့ ပိုခက်လာမည်။

အလွန်အကျွံ စိတ်ဖိစီးလာသည့်အခါ ဦးနှောက်အတွင်း ရည်မှန်းချက် ဖော်ဆောင်ရေး တာဝန်ယူသည့် အပိုင်းတွင် စိတ်ဖိစီးဟိုမုန်းများ ဖုံးလွှမ်း နှောင့်ယှက်သဖြင့် လူသည်လုပ်မည့် အလုပ်ကို ပြီးမြောက်အောင်လုပ်ဖို့ ပိုခက်ခဲလာရသည်။ ထိုသို့ ဖြစ်လာသည့်အခါ လူသည် ရည်မှန်းချက် ပေါက်မြောက်ရေး အတွက် နည်းလမ်းသစ်များ တီထွင်ဖန်တီး အသုံးချနိုင်စွမ်းလည်း ကုန်ခမ်းသွားပြီး လမ်းဆိုး၊ အကျင့်ဆိုးကိုသာ ဆက်လုပ်မိကာတော်တော်နဲ့ အလုပ်မပြီးမြောက်သည့် ပြဿနာ ကြုံလာရတော့သည်။

၄။ မယဉ်မကျေးသမား ဖြစ်လာမည်။

အလွန် စိတ်ဖိစီးလာသည့်အခါ လုပ်မိလုပ်ရာ လုပ်ဖြစ်လာသည်။ စာမေးပွဲကျမှာ စိုးရိမ်လွန်မှုကြောင့် စာခိုးချဖြစ်သည့်ဆီ ရောက်သွားခြင်းမျိုး။ မကြာသေးခင်က လုပ်ထားသော စစ်တမ်းတစ်ရပ် အရလည်း တက်စ်တို စထရုန်းဓာတ်နှင့် စိတ်ဖိစီးစေသောကော်တီဇုန်းဓာတ်တို့ များနေသူတိုသည် စာမေးပွဲမှာ ပိုခိုးချလေ့ရှိကြောင်း တွေ့ရသည်။

၅။ တစ်ခုရဖို့ လျှာထွက်မတတ် ဇွတ်လုပ်ဖို့ ၀န်မလေး။

စိတ်အလွန်ဖိစီး အလောသုံးဆယ် နိုင်နေချိန်မျိုးတွင် ပျောက်နေသော ဘောပင်တစ်ချောင်း တွေ့ဖို့အရေး တစ်အိမ်လုံးက အဝတ်ဗီရိုတွေကို လျှောက်ဖွဖို့ ၀န်လေးမည် မဟုတ်။ တစ်ကယ်လည်း ဖွမိလိမ့်မည်။ အဝတ်ဗီရိုတွေ လိုက်ဖွခြင်း အကျိုးဆက် ဆိုးကျိုးသည် ဘောပင် တစ်ချောင်း တွေ့ရှိခြင်းထက် များစွာ ကြီးလေးသည့်တိုင် စိတ်ဖိစီးနေချိန်တွင် ဘာမှမတွေးနိုင်ဘဲ ဖွမိလိမ့်မည်။ စိတ်ငြိမ်သွားသော အခါကျမှ မိမိဖွထားသမျှ ကြည့်ပြီး ငါတော်တော် မိုက်ပါလားဟု ကိုယ့်ခေါင်း ကိုယ်ထုမိလိမ့်မည်။

၆။ မလိုအပ်ဘဲ ပိုစွန့်စားလိမ့်မည်။

စိတ်အလွန် ဖိစီးနေသည့်အခါ ကိုယ့်ကို စိတ်ဖိစီးစေသည့် ပြဿနာကို မြန်မြန် ပြေလည်ရေးကိုသာ အာရုံထားတော့သည်။ ကျန်တာဘာမှ မတွေးတော့။ အန္တရာယ် ဖြစ်စေသည့် ကိစ္စမျိုးကိုပင် အန္တရာယ်မှန်း မကြောက်နိုင်ဘဲ ဇွတ်တိုးလုပ်တော့သည်။ ကိုယ့်ကျောပေါ်ခွစီးနေသည့် စိတ်ဖိစီးမှု ၀န်ထုပ် မြန်မြန်ချပစ်နိုင်ရေးသာ ကိုယ့််စိတ်ထဲမှာ ရှိသည်။ ထိုသို့ဖြစ်ရခြင်းမှာ လူ့ဦးနှောက်သည် စိတ်ဖိစီးစေသည့် အင်ဇိုင်းများကို ချေမှုန်း တိုက်ဖျက်သည့် အလုပ်နဲ့ချည်း ၀န်ပိနေသောကြောင့် ကျန်အပိုင်းများမှာ အာရုံလျော့ကာ အန္တရာယ် ရှိသည်ကိုပင် အန္တရာယ်ဟု သတိ မပေးဖြစ်တော့ခြင်းကြောင့် ဖြစ်သည်။

၇။ မေ့တာ လျော့တာ ပိုဖြစ်လာမည်။

အလွန်အကျွံ စိတ်ဖိစီးလာသည့်အခါ လူက လောလောလော လောဖြစ်နေပြီး တစ်ခြားဟာတွေ မေ့နေလျော့နေလိမ့်မည်။ အလုပ်တွေ ဖိစီးပြီး အာရုံတွေများနေလျှင် မေ့တတ်တာထုံးစံပင်။ ကြွက်များနှင့် လေ့လာကြည့်သည့်အခါ စိတ်ဖိစီးလွန်းပါက ဦးနှောက်အတွင်း စိတ်ဖိစီး ဟိုမုန်းများသည် ဦးနှောက်ကို ပုံစံပြောင်းသွားစေကာ ခံစားချက် နောက်လိုက်ပြီး တုံ့ပြန်အောင် လုပ်ပစ်လိုက်သည်။ ထိုအခါ လူသည် အချက်အလက်သိမှု အားနည်းသွားကာ မှတ်သားထားသည်များ မေ့လျော့လာတော့သည်။ စိတ်ဖိစီးမှုကျသွားပြီး လူကအေးအေးဆေးဆေး ရှိလာပါမှ မေ့နေတာတွေ ပြန်မှတ်မိ လာတော့သည်။

Healthcare.com.mm

Ref:

Messenger Journal