သွေးဆုံးချိန်တွင်ဖြစ်တတ်သော ပြဿနာ

         အမျိုးသမီးတိုင်း ရာသီစက်ဝန်းကို ကြုံတွေ့ရသလို မီးယပ်သွေးဆုံးချိန်ကိုလည်း ဖြတ်ကျော်ကြရပါတယ်။ အမျိုးသမီးတစ်ယောက်နဲ့တစ်ယောက် ခံစားရတဲ့ ဝေဒနာအပြင်း၊ အပျော့နဲ့ ခံစားရတဲ့ အချိန်အတိုင်းအတာကွာခြားနိုင်ပါတယ်။

          အမျိုးသမီးတွေရဲ့ ဘဝတစ်လျှောက်လုံးမှာ ကျန်းမာတဲ့နေထိုင်မှုပုံစံနဲ့ နေထိုင်မှုရှိ၊ မရှိက မီးယပ်သွေးချိန်နဲ့ ဆက်စပ်မှုရှိပါတယ်။ သွေးပေါင်ချိန်တာ၊ သွေးတွင်းကိုလက်စထရော၊ သွေးတွင်းသကြားဓာတ်တိုင်းတာနဲ့ ပုံမှန်ရင်သားဓာတ်မှန်ရိုက်တာ (Mammogram) တွေကို ပြုလုပ်ပေးပါ။

          မီးယပ်သွေးဆုံးချိန်မှာ သွက်လက်ထက်မြက်နေစေဖို့ လေ့ကျင့်ခန်းကို ပုံမှန်လုပ်ဆောင်ရပါမယ်။ အေရိုးဗစ်လေ့ကျင့်ခန်းနဲ့ အရိုးတွေသန်မာစေတဲ့ လေ့ကျင့်ခန်းနှစ်ခုစလုံးက ကိုယ်အလေးချိန်ကို ထိန်းပေးပြီး စိတ်ဓာတ်ခွန်အားကိုလည်း မြှင့်တင်ပေးနိုင်ပါတယ်။

          အသက် ၁၈ နှစ်ကနေ ၅၀ နှစ်အတွင်း လိင်ဆက်ဆံနေစဉ်အတွင်းမှာ မိန်းကလေးတွေရဲ့ ၁၇ ရာခိုင်နှုန်းက မိန်းမကိုယ်ခြောက်သွေ့တာကို ခံစားရတာကြောင့် အိမ်ထောင်ရေးသာယာမှု ဆိတ်သုဉ်းနေတတ်ပါတယ်။ မီးယပ်သွေးဆုံးပြီးနောက်ပိုင်းမှာတော့ မိန်းမကိုယ် ပိုမိုခြောက်သွေ့တာကြောင့် အမျိုးသားဆီက ကြင်နာတဲ့အပြုအမူတွေကို ပိုမိုမျှော်လင့်မိတာဖြစ်ပါတယ်။ သွေးဆုံးပြီးချိန်မှာ သားဥအိမ်ကနေ မဟော်မုန်းအီစထရိုဂျင်ထုတ်လုပ်မှုလျော့နည်းသွားတာကြောင့် မိန်းမကိုယ်နှုတ်ခမ်းတစ်စုံဟာ ပါးလွှာပြီး ကျုံ့နိုင်ဆန့်နိုင်အားလျော့နည်းလာကာ မိန်းမကိုယ်ခြောက်သွေ့လာပါတယ်။ မီးယပ်သွေးဆုံးပြီးသူတွေရဲ့ ၅၈ ရာခိုင်နှုန်းမှာ မိန်းမကိုယ်နှုတ်ခမ်းကျုံ့သွားတာ ဖြစ်ပေါ်တတ်ပါတယ်။

ခံစားရနိုင်သော လက္ခဏာများ

          မိန်းမကိုယ်ခြောက်သွေ့တာကြောင့် လိင်မှုကိစ္စဆောင်ရွက်ရာမှာ နာကျင်မှုကို ခံစားရနိုင်ပါတယ်။ ယောနိလမ်းကြောင်းက ပါးလွှာလာတာကြောင့် ထိခိုက်ပွန်းပဲ့မှု ပိုမိုဖြစ်လွယ်ပါတယ်။ လိင်ဆက်ဆံတိုင်းမှာ ထိခိုက်ပွန်းပဲ့မှုနဲ့ နာကျင်မှုတွေကို ခံစားရတာကြောင့် စိတ်ဆန္ဒအားနည်းလာတာ စိတ်ဓာတ်ကျတာတွေကို ဖြစ်လာနိုင်ပါတယ်။

ဖြည့်စွက်ဗီတာမင် မှီဝဲပါ

          မိန်းမကိုယ်ခြောက်သွေ့မှုကို ကာကွယ်ဖို့အတွက် ဗီတာမင် အေ၊ ဘီ၊ အီး၊ အိုမီဂါ - ၃ နဲ့ ဇင့်ဓာတ်တွေကို ဖြည့်စွက်မှီဝဲပေးဖို့ လိုပါတယ်။ ဒီဗီတာမင်တွေက အရွတ်တွေရဲ့ လှုပ်ရှားဆောင်ရွက်မှုကောင်းစေဖို့၊ အဆစ်တွေ ကွေးဆန့်မှု ကောင်းစေဖို့နဲ့ ကြွက်သားတွေ သန်မာစေဖို့အတွက်လည်း များစွာ အကျိုးရှိပါတယ်။ ဗီတာမင်ဘီက စိတ်ဖိစီးမှုကို လျှော့ချပေးပြီး ဗီတာမင်အေက အချွဲမြေးလွှာတွေရဲ့ ကျုံ့နိုင်ဆန့်နိုင်အားကို ကောင်းမွန်စေတာကြောင့် မိန်းမကိုယ် ခြောက်သွေ့သူတွေ ဖြည့်စွက်မှီဝဲသင့်ပါတယ်။

နေထိုင်မှုပုံစံပြောင်းပါ

          အရက်၊ ကော်ဖီနဲ့ ကဖင်းဓာတ် ပါဝင်တဲ့ တခြားအချိုရည်တွေ သောက်သုံးတာက ခန္ဓာကိုယ်မှာ ရေဓာတ်ခန်းခြောက်မှုကို ဖြစ်စေတဲ့အပြင် မိန်းမကိုယ်ခြောက်သွေ့မှုကိုပါ ဖြစ်စေပါတယ်။ အချိုရည်တွေအစား ရေများများသောက်ပါ။ ကာဗိုဟိုက်ဒရိတ်ပါဝင်စာတွေကို လျှော့စားပါ။

ဆေးဝါးသောက်သုံးမှုကို ပြန်လည်ဆန်းစစ်ပါ။

          တချို့ဆေးဝါးတွေက မိန်းမကိုယ်ရှိအချွဲမြှေးလွှာခြောက်သွေ့မှုကို ဖြစ်စေပါတယ်။ အအေးမိနှာစေးပျောက်ဆေး၊ ဓာတ်မတည့်မှုအတွက် အသုံးပြုရတဲ့ ဆေး၊ ပဋိသန္ဓေတားဆေးတွေက မိန်းမကိုယ်ခြောက်သွေ့မှုကို ဖြစ်စေတာကြောင့် ဆရာဝန်နဲ့တိုင်ပင်ပြသပြီးမှ သောက်သုံးသင့်ပါတယ်။

အလွန်အမင်းသန့်စင်ခြင်းမှရှောင်ကြဉ်ပါ။

          အမွှေးနံ့ပြင်းပြီး ဓာတုပစ္စည်းတွေ ပါဝင်တဲ့ မိန်းမကိုယ်သန့်စင်ဆေးရည်တွေကို အလွန်အမင်းသုံးစွဲပြီး သန့်စင်တာ၊ ယောနိလမ်းကြောင်းအတွင်းထဲအထိ သန့်စင်ဆေးကြောတာတွေက မိန်းမကိုယ်ခြောက်သွေ့မှုကို ဖြစ်စေပါတယ်။ သဘာဝပါဝင်ပစ္စည်းတွေနဲ့ ပေါင်းစပ်ထုတ်လုပ်ထားတဲ့ မိန်းမကိုယ်သန့်စင်ဆေးရည်တွေကိုသာ အသုံးပြုသင့်ပါတယ်။

မီးယပ်သွေးဆုံးချိန်တွင် စားသောက်သင့်သည်များ

          အမျိုးသမီးတွေ သွေးဆုံးချိန်မှာ စားသုံးသင့်တာနဲ့ပတ်သက်တဲ့ အခြေခံလေးတွေသိထားသင့်ပါတယ်။

ကယ်လ်စီယမ်

          နို့နဲ့ နို့ထွက်ပစ္စည်းတွေကို တစ်နေ့နှစ်ကြိမ်ကနေ လေးကြိမ်စားသုံးပါ။ အရိုးပါစားနိုင်တဲ့ ငါးလေးတွေ၊ ပန်းဂေါ်ဖီစိမ်း၊ ပဲနွယ်ပဲညွန့်စတာတွေကနေ ကယ်လ်စီယမ် တစ်နေ့ကို ၁၂၀၀ မီလီဂရမ် ရရှိအောင် စားသုံးပါ။

သံဓာတ်

          သံဓာတ်ပါတဲ့ အစားအစာတွေကို တစ်နေ့ သုံးကြိမ်ပါဝင်အောင် စားသုံးပါ။ အနီရောင်အစားအစာတွေ၊ ကြက်သား၊ ငါး၊ ဥအမျိုးမျိုး၊ အစိမ်းရင့်ရောင် ဟင်းသီးဟင်းရွက်၊ အစေ့အဆန်၊ ကောက်နှံကွေကာ စတာတွေကနေ သံဓာတ်ကို ရရှိနိုင်ပါတယ်။ သက်ကြီးအမျိုးသမီးတွေအနေနဲ့ တစ်နေ့ကို သံဓာတ် ၈မီလီဂရမ် စားသုံးသင့်တယ်လို့ ပြောထားပါတယ်။

အမျှင်ဓာတ်

          ကောက်နှံတစ်ခုလုံးပါဝင်စာ၊ ဆန်လုံးညို၊ လတ်ဆတ်တဲ့သစ်သီးနဲ့ ဟင်းသီးဟင်းရွက်တွေကနေ အမျှင်ဓာတ်များများ ရရှိအောင် စားသုံးပါ။ အရွယ်ရောက်ပြီး အမျိုးသမီးတစ်ယောက်အနေနဲ့ တစ်နေ့ကို အမျှင်ဓာတ် ၂၁ ဂရမ်ရရှိအောင် စားသုံးသင့်ပါတယ်။

အဆီများတဲ့ အစာတွေကို လျှော့ချပါ

          ပြည့်ဝဆီတွေ စားသုံးတာများရင် သွေးတွင်းကိုလက်စထရောတွေတက်လာပြီး နှလုံးနဲ့ သွေးကြောရောဂါတွေ ဖြစ်ပွားနိုင်ခြေကို မြင့်တက်စေပါတယ်။ တိရစ္ဆာန်အဆီတွေ၊ အဆီဖယ်မထားတဲ့ နွားနို့၊ ရေခဲမုန့်နဲ့ ချိစ်တွေမှာ ပြည့်ဝဆီတွေ ပါဝင်မှုများပါတယ်။ တစ်နေ့ကို ကိုလက်စထရော ၃၀၀ မီလီဂရမ်အောက် လျော့နည်းပြီး စားသုံးသင့်ပါတယ်။

ဆားနဲ့သကြားကို အသင့်အတင့်သာ စားပါ

          ဆားများတဲ့ အစားအသောက်တွေကြောင့် သွေးဖိအားမြင့်တက်နိုင်ပါတယ်။ ကင်ထားတဲ့ အစားအစာတွေ၊ ကျပ်တင်ထားတဲ့အစားအစာတွေ၊ ဆားနယ်ထားတဲ့ အစားအစာတွေ စတာတွေမှာ နိုက်ထရိတ်တွေ များနေတတ်လို့ ကင်ဆာရောဂါနဲ့ ဆက်စပ်နေပါတယ်။

ဗီတာမင် ဒီ

          ကယ်လ်စီယမ်ကို ခန္ဓာကိုယ်က စုပ်ယူဖို့အတွက် ဗီတာမင်ဒီ လိုအပ်ပါတယ်။ အသက် ၅၁ နှစ်ကနေ ၇၀ အတွင်း ရှိသူတွေအနေနဲ့ တစ်နေ့ကို ဗီတာမင် ဒီ ၆၀၀ အိုင်ယူရရှိသင့်ပါတယ်။ အသက် ၇၀ နှစ်ကျော်တွေအနေနဲ့ တစ်နေ့ကို ၈၀၀ အိုင်ယူ ရရှိသင့်ပါတယ်။ တစ်နေ့ကို ဗီတာမင်ဒီ ၄၀၀၀ အိုင်ယူထက် ပိုပြီးမသုံးသင့်ပါဘူး။ ကျောက်ကပ်နဲ့ အရိုးတွေကို ထိခိုက်နိုင်တာကြောင့်ပါ။

 Credit : ဇာခြည်ဝင်း (ဆေးဝါးတက္ကသိုလ်)