အားကစားကြောင့် ထိခိုက်မှုတွေဖြစ်ရင် ဘယ်လိုကုသမှုပေးရပါသလဲ။

အားကစားကြောင့် အများအားဖြင့် ဖြစ်တဲ့ အရွတ်နည်းနည်းပြဲတာ (Sprain)၊ ပြတ်တာ၊ အသားကြောတာ (Contusion) စတာတွေက သိပ်မဆိုးလှဘူးဆိုရင် အိမ်မှာပဲ ကုသလို့ ရပါတယ်။ 

(၁) အနားပေးရပါတယ်။ RICE ကုသမှုလို့ ခေါ်ပါတယ်။

R-Rest - အနားယူပါ။ ခြေထောက်ထိခိုက်ရင် လမ်းသိပ်မလျှောက်ဖို့၊ လိုအပ်ရင် တုတ်၊ ချိုင်းထောက်နဲ့ လျှောက်ပြီး အနားယူပါ။ လက်ထိခိုက်ရင် လက်သိုင်းကြိုးစည်း ထားပေးရပါမယ်။

I-Ice - ရေခဲအုပ်တာဖြစ်ပါတယ်။ တခြားနိုင်ငံတွေမှာတော့ ရေခဲအိတ်လေးတွေ ရှိတယ်။ ဆရာတို့ဆီမှာ မရှိရင် ရေခဲတုံးသေးလေးကိုပလတ်စတစ်အိတ် ထဲထည့်ပြီး ပိတ်စပါးပါးလေးနဲ့ ထုပ်ပြီးကပ်ပေးရမယ်။ အများအားဖြင့် ၁၅ မိနစ်လောက် ကပ်ပေးပါ။ မိနစ် ၂၀ ထက်ကျော်လို့မကောင်းပါဘူး။ တစ်နေ့ကို ၅-၆ ခါလောက် ကပ်လို့ရပါတယ်။ ဒါပေမယ့် ရေခဲကပ်တာကို ထိခိုက်ဒဏ်ရာရပြီး ၂၄-၂၈ နာရီအတွက်းမှာပဲ လုပ်ပေးသင့် ပါတယ်။ တချို့လူနာတွေက ထိခိုက်ဒဏ်ရာရတာက ၅-၆ ရက်ကျော်နေပြီ။ ရေခဲကပ်နေ တုန်းပဲ ရှိသေးတယ်။ ဒီအချိန်က ရေခဲကပ်ရမယ့်အချိန် မဟုတ်တော့ပါဘူး။ 

C-Compression-ထိခိုက်မိလို့ နာသွားတဲ့၊ ရောင်သွားတဲ့ နေရာတွေကို Elastic Bandage ပတ်တီးလေး စည်းပေးထားရတာ ဖြစ်ပါတယ်။ ပတ်တီးကို ကျပ်ကျပ်မစည်း ရပါဘူး။ ပတ်တီးကို တင်းတင်းလေး စည်းထားပေးတဲ့အတွက် ရောင်ရမ်းမှု သက်သာစေ ပါတယ်။ ကျပ်လွန်းရင် သွေးလှည့်ပတ်မှုကို ထိခိုက်စေနိုင်ပါတယ်။ 

E-Elevation-မြှင့်ထားပါ။ ဆိုလိုတာက ခြေထောက်ထိခိုက်မိတယ် ဆိုရင် ခြေထောက်ကို မြှောက်ထားဖို့လိုပါတယ်။ လက်ဆိုရင်လည်း သိုင်းကြိုးစည်းပြီး မြှောက်ထားပေးရပါမယ်။ ဒီလိုလုပ်ပေးတာကြောင့် တော်ရုံတန်ရုံ ထိခိုက်မှုတွေ သက်သာသွားပါလိမ့်မယ်။

Healthcare.com.mm သင့်ကျန်းမာရေး စောင့်ရှောက်ပေး
Cerdit:
ပါမောက္ခဦးနေဝင်း
အရိုးခွဲစိတ်အထူးကုဆရာဝန်ကြီး
Arogyam magazine, No.253, August 2013, Pg. 33-34