Vitamin ထဲက Vitamin များ

အဆီမှာပျော်ဝင်သော ဗီတာမင်များအကြောင်းနဲ့ နေ့စဉ်စားသုံးရမယ့် စားသုံးသင့်တဲ့ ပမာဏများကို ရေးသားဖော်ပြပြီးတဲ့အခါ ခန္ဓာကိုယ်အတွက် အကျိုးပြုဗီတာမင်များဖြစ်တဲ့ ရေမှာပျော်ဝင်တဲ့ ဗီတာမင်များရဲ့ အသုံးပြုပုံနဲ့ နေ့စဉ်စားသုံးဖို့လိုတဲ့ အချိုးအဆတွေကိုလည်း ဆက်လက်ပြီး စုစည်းရေးသားဖော်ပြလိုပါတယ်။

ရေမှာပျော်ဝင်သောဗီတာမင်များ
ဗီတာမင်စီ၊ ဘီဝမ်း (Thiamin)၊ ဘီတူး (Riboflavin)၊ ဘီသရီး (Niacin )၊ ဘီစစ် (Pyridoxine)၊ ဖောလိတ် (Folate)၊ ဘီတွဲလ် (Cobalamin )၊ ဘိုင်အိုတင် (Biotin )၊ ခိုလင်း (Choline) တို့ကို ရေမှာပျော်ဝင်တဲ့ ဗီတာမင်တွေအဖြစ်သတ်မှတ်ထားပါတယ်။ ဒီဗီတာမင်တွေဟာ ခန္ဓာကိုယ်ရဲ့ခုခံအား တိုးမြင့်စေဖို့၊ အာရုံကြောစနစ်ကောင်းမွန်ပြီး မှတ်ဉာဏ်စွမ်းရည်ကောင်းမွန်ဖို့၊ ခန္ဓာကုယ်ရဲ့ အရေးကြီးအင်္ဂါအစိတ်အပိုင်းတွေကို အားဖြည့်စေဖို့ အလွန်အရေးပါတာမို့ နေ့စဉ်စားသုံးနေတဲ့ အစားအစာထဲမှာပါဝင် သင့် ပါတယ်။ ဒီဗီတာမင်တွေကရော သင့်ခန္ဓာအတွက် ဘယ်ပုံဘယ်လိုအကျိုးပြုနေတာဆိုတာရယ်နဲ့ ဘယ်လောက်စားသုံးရမယ်ဆိုတာကို ဆက်လက်လေ့လာကြည့်ပါဦး။ 

ခန္ဓာကိုယ်အတွက် Ascorbic Acid (ဗီတာမင်စီ)
ဗီတာမင်စီဆိုရင် စာဖတ်ပရိတ်သတ်အတွက်စိမ်းမယ်မထင်ပါဘူး။ ဗီတာမင်စီရဲ့ ကောင်းကျိုးအဖြာဖြာကလည်း စိတ်ဝင်စားဖို့ကောင်းလှပါတယ်။ ခန္ဓာကိုယ်ခုခံအားကိုတိုးမြှင့်ပေးလို့ ရောဂါပိုးမွှားတွေအန္တရာယ်ကို ကာကွယ်ပေးပါတယ်။ ဒါ့အပြင် ဗီတာမင်စီတွေဟာ့ အသားအရေကိုနုပျိုတင်းရင်းစေပါသတဲ့။ ဒါကြောင့်လည်း ယနေ့ဈေးကွက်ထဲမှာ ဗီတာမင်စီကြောင့် ရောင်းပန်းလှတဲ့ အသားအရေလိမ်းဆေးတွေ၊ အလှကုန်တွေက အများအပြားရောင်းချနေနေကြတာပါ။နောက်ပြီး ဗီတာမင်စီဟာ အနာကျက်မြန်တာမို့ ထိခိုက်ဒဏ်ရာရသူတွေနဲ ့ ခွဲစိတ်ပြီး လူနာတွေအနေနဲ့ ဗီတာမင်စီကို များများမှီဝဲပေးဖို့လိုပါတယ်။ ဓာတ်တိုးဆန့်ကျင်အာနိသင်ရှိတဲ့ဗီတာမင်စီဟာ သွေးကြောတွေအားကောင်းအောင် ထောက် ပံ့နိုင်တာမို့ သွေးလည်ပတ်မှုစနစ်ကို ကောင်းစေပါတယ်။ ထို့အပြင် ဗီတာမင်စီဟာ သံဓာတ်စုပ်ယူမှုမှာလည်း ပါဝင်ကူညီပါသေးတယ်။ ဒါကြောင့် ကျန်းမာရေးကောင်းမွန်စေဖို့ ဗီတာမင်စီကိုနေ့စဉ် အစားအစာထဲမှာ ထည့်သွင်းစားသုံးပေးဖို့ တိုက်တွန်းပါရစေ။

သဘာဝဗီတာမင်စီ အရင်းအမြစ်
ဗီတာမင်စီကို အပေါများဆုံးရရှိနိုင်တာက သစ်သီးဝလံတွေကပါပဲ။ အရည်ရွှမ်းအသီးအနံှတွေနဲ့ အချဉ်ဓာတ်ရှိတဲ့ အသီးတွေမှာ ဗီတာမင်စီကြွယ်ဝစွာ ပါဝင်ပါတယ်။ ရှောက်သီး၊ သံဖရာသီးလို ချဉ်တဲ့အသီးတွေ၊ စတော်ဘယ်ရီ၊ ဖရဲသီး၊ သခွားမွှေးသီးလို အရည်ရွှမ်းသီးတွေမှာသာမက ပန်းဂေါ်ဖီစိမ်း၊ ကိုက်လန်၊ ခရမ်းချဉ်သီးနဲ့ အာလူးတို့လို ဟင်းသီးဟင်းရွက်တွေကနေလည်း ဗီတာမင်စီဓာတ် ကိုရရှိနိုင်ပါတယ်။ ဒါအပြင် ငရုတ်ကောင်းနဲ့ ငရုတ်သီးလို ပူစပ်တဲ့ အသီးအနှံတွေ မှာလည်း ဗီတာမင်စီပါဝင်မှုပမာဏ မြင့်မားစွာရှိပါသတဲ့။

တစ်နေ့တာစားသုံးရမယ့် ဗီတာမင်စီ
အရွယ်ရောက်ပြီး အမျိုးသားတစ်ယောက်အနေနဲ့ တစ်နေ့တာအတွက် ဗီတာမင်စီပမာဏ ၉ဝ မီလီဂရမ် စားသုံးပေးဖို့လိုသလို အရွယ်ရောက်ပြီး အမျိုးသမီး တစ်ယောက်ကတော့ ၇၅ မီလီဂရမ် ရရှိဖို့ လိုပါတယ်။ တစ်နေ့တာအတွက် ၂ဝဝဝ မီလီဂရမ် ထက်ပိုပြီး ဗီတာမင်စီကို မစားသုံးပါနဲ့လို့ အကြံပြုချင်ပါတယ်။

Ref ; ZIWAKA MAGAZINE 

သင်သိလိုသမျှ ကျန်းမာရေးမေးခွန်းများနှင့် ပတ်သက်၍ Healthcare.com.mm ၏ hotline နံပါတ် 7887 သို့ MPT မိုဘိုင်းလ်ဖုန်းဖြင့် ၂၄ နာရီ အချိန်မရွေး  ခေါ်ဆိုပြီး ဆရာဝန်များနှင့် တိုက်ရိုက်ဆွေးနွေးတိုင်ပင်နိုင်ပါပြီရှင်။