မိန်းကလေးများ ဖြစ်တတ်သော မိန်းမကိုယ်ဆိုင်ရာရောဂါများ

ဆီးစပ်နာကျင်တာ၊ ရာသီသွေး ပုံမမှန်တာ၊ အဖြူဆင်းတာ၊ မိန်းမကိုယ် ယားယံတာ စတဲ့ ဝေဒနာတွေက အမျိုးသမီးအများစု ခံစားရနိုင်တာတွေ ဖြစ်တာကြောင့် သိရှိထားဖို့ လိုအပ်ပါတယ်။

ဆီးစပ်နာကျင်ခြင်း

မိန်းကလေးတွေဟာ ဓမ္မတာမလာမီနဲ့ ဓမ္မတာစက်ဝန်းအလယ် သားဥကြွေချိန်တွေ ဆီးစပ်နာကျင်တာကို ခံစားရတတ်ပါတယ်။ တစ်ဦးနဲ့တစ်ဦးမတူဘဲ တချို့တွေမှာ ဆီးစပ်နာကျင်တာကို သိသိသာသာခံစားရပြီး တချို့တွေကတော့ သိသိသာသာ နာကျင်မှု မရှိတာကို တွေ့ရပါတယ်။

ဆရာဝန်နှင့် ပြသပါ

တကယ်လို့ ဆီးစပ်နာကျင်မှုက နာတာရှည်ဖြစ်နေတယ် ဆိုရင်တော့ ဆရာဝန်နဲ့ ပြသတိုင်ပင်ဖို့ လိုအပ်ပါတယ်။ ဆရာဝန်က သင်ရဲ့ မျိုးပွားအင်္ဂါမှာ ကင်ဆာမဟုတ်တဲ့ အလုံးအဖုနဲ့ အသားလုံးရှိ၊မရှိ စစ်ဆေးပါလိမ့်မယ်။ ဆီးစပ်နာကျင်မှုအပြင် ယောနိလမ်းကြောင်းမှ ပုံမမှန် အရည်ဆင်းတာနဲ့ အဖျားတက်တာတွေ ရှိနေပါက မျိုးပွားအင်္ဂါတွေ ရောင်ရမ်းမှုရှိ၊မရှိကိုပါ စစ်ဆေးပေးပါလိမ့်မယ်။

ဖြစ်နိုင်ခြေများသော ရောဂါများ

ဝမ်းဗိုက် အလွန်အမင်းနာကျင်တာ ဒါမှမဟုတ် ဆီးစပ် အလွန်အမင်းနာကျင်မှုတွေ ဖြစ်ပေါ်လာခဲ့ရင် သားဥအိမ်မှာ ဖြစ်ပေါ်နေတဲ့ အရည်အိတ်ပေါက်သွားတာ၊ သွေးထွက်တာတွေ ဖြစ်နိုင်တာကြောင့် ဆရာဝန်နဲ့ ပြသသင့်ပါတယ်။ ဆီးစပ်တစ်လျှောက် အလွန်နာကျင်ပြီး သွေးဆင်းတာပါ ဖြစ်ပေါ်ခဲ့ရင် နေရာလွဲမှား သန္ဓေသားကို သန္ဓေဆောင်ထားတာကြောင့် ဖြစ်နိုင်ပါတယ်။ ဆီးစပ်နာကျင်မှု ခံစားရတာ၊ လေပွတာ၊ ဆီးစပ်တစ်လျှောက် တင်းသလို ခံစားနေရတာ၊ မကြာခဏ ဆီးသွားတာတွေ နှစ်ပတ်နဲ့အထက် ခံစားနေရပါက သားဥအိမ်ကင်ဆာနဲ့လည်း ဆက်စပ်မှုရှိနိုင်တာကြောင့်
ဆရာဝန်နဲ့ ပြသဖို့ လိုပါတယ်။

ပုံမမှန် သွေးဆင်းခြင်း

ပဋိသန္ဓေတားဆေး သောက်သုံးတာ၊ ထိုးဆေး အသုံးပြုတာ စတဲ့ ပဋိသန္ဓေတားနည်းတွေကို အသုံးပြုတာကြောင့် ရာသီသွေးဆင်းမှု ပုံမမှန်တာ ဖြစ်တတ်ပါတယ်။ စိုးရိမ်စရာ မရှိပါဘူး။ လိုအပ်ပါက ပဋိသန္ဓေတားနည်းကို ပြောင်းလဲအသုံးပြုဖို့ ဆရာဝန်က ညွှန်ကြားပါလိမ့်မယ်။ ပုံမမှန် သွေးဆင်းမှုဆိုသည်မှာ ပုံမမှန် သွေးဆင်းတာက ခါတိုင်း ရာသီသွေးဆင်းတဲ့ရက်ထက် ကျော်လွန်ပြီး သွေးဆင်းနေတာ၊ တစ်လနဲ့ တစ်လကြားမှာ နောက်တစ်ကြိမ် သွေးဆင်းတာ၊ တစ်လထဲကို ရာသီသွေး နှစ်ကြိမ်ဆင်းတာ၊ လိင်ဆက်ဆံပြီးချိန်မှာ သွေးဆင်းတာနဲ့ တခြားမူမမှန် သွေးဆင်းတာတွေဖြစ်နိုင်ပါတယ်။

ဖြစ်နိုင်ခြေများသော အကြောင်းများ

မူမမှန် သွေးဆင်းရတဲ့ အကြောင်းအချက်တွေ များစွာရှိပါတယ်။ သွေးဆုံးခါနီး အမျိုးသမီးတွေ၊ သားဥပြွန်အတွင်း သွေးလုံးတည်တာ၊ အသားလုံးတည်တာ၊ သိုင်းရွိုက်အကျိတ်မှာ ရောဂါရှိတာ စတာတွေကြောင့် ရာသီသွေးဆင်းတာ ပုံမမှန်ဖြစ်တတ်ပါတယ်။ နို့တိုက်မိခင်တွေနဲ့ သွေးဆုံးပြီး အမျိုးသမီးတွေမှာ ယောနိလမ်းကြောင်း ခြောက်သွေ့တာကြောင့် လိင်ဆက်ဆံတဲ့အခါ သွေးထွက်ပြီး နာကျင်မှု ခံစားရတာတွေ ဖြစ်တတ်ပါတယ်။

ဖြစ်နိုင်ခြေများသော ရောဂါများ

လိင်ဆက်ဆံပြီးတဲ့ အခါတိုင်းမှာ သွေးဆင်းတာ၊ သားအိမ်ခေါင်းက အထိမခံနိုင်လောက်အောင် နာကျင်တာတွေ ဖြစ်ခဲ့ရင် ဂနို၊ ကလန်မိုင်ဒီးယားစတဲ့ လိင်မှတစ်ဆင့် ကူးစက်တတ်တဲ့ ပိုးဝင်တာတွေ ဖြစ်နိုင်ပါတယ်။ သွေးဆုံးပြီး အမျိုးသမီးတွေ ရာသီသွေး ဆင်းလာခဲ့ရင် သားအိမ်ကင်ဆာ ဖြစ်နိုင်ပါတယ်။ စောစောစီးစီး သိရှိပါက ရောဂါပျောက်ကင်းအောင် ကုသနိုင်တာကြောင့် သွေးဆင်းတဲ့ လက္ခဏာ ပြသပါကပေါ့ဆမနေဘဲ ဆရာဝန်နဲ့ ပြသပြီး စစ်ဆေးမှုခံယူပါ။

ပုံမမှန် အဖြူဆင်းခြင်း

အမျိုးသမီးတွေက ကိုယ်ရဲ့ခန္ဓာဗေဒကို ကောင်းစွာသိရှိပါတယ်။ အထူးသဖြင့် မိန်းမကိုယ်က ထွက်ရှိတဲ့ အရည်တွေနဲ့ ပတ်သက်ပြီးလည်း ကိုယ့်ကိုယ်ကိုယ် သိရှိကြပါတယ်။ ပုံမှန်အရောင်အဆင်း၊ အနံ့အသက်တွေကိုလည်း သိရှိထားကြပါတယ်။
ပုံမမှန် အဖြူဆင်းခြင်းဆိုသည်မှာ မိန်းမကိုယ်က ထွက်ရှိတဲ့ အရည်ရဲ့ အနံ့အသက်က ဆိုးဆိုးရွားရွား နံလာတာ၊ အဖြူတွေ အများကြီးဆင်းတာ၊ ပူစပ်ပူလောင်ဖြစ်တာ၊ ယားယံတာနဲ့ ပုံမမှန်တဲ့ အရောင်အဆင်း ဖြစ်နေတာတွေပါ။

ဖြစ်နိုင်ခြေများသော အကြောင်းများ

ပုံမမှန် အဖြူဆင်းတာ ဖြစ်ရတဲ့အကြောင်းက မှိုစွဲတာ၊ ဘက်တီးရီးယားပိုး ဝင်တာတွေကြောင့် အဖြစ်များပါတယ်။ လိင်မှတစ်ဆင့် ကူးစက်တတ်တဲ့ ရောဂါပိုးမွှားတွေကြောင့်လည်း မူမမှန် အဖြူဆင်းတာကို ဖြစ်စေတာကြောင့် ဆရာဝန်နဲ့ ပြသစစ်ဆေးဖို့ လိုပါတယ်။

ဖြစ်နိုင်ခြေများသော ရောဂါ

အဖြူဆင်းတာက ရေလိုပဲ အရောင်မရှိတဲ့ ကြည်ကြည်အရည်တွေ ကြာရှည်ဆင်းနေတာက သားဥြွပန်ကင်ဆာ ဖြစ်နိုင်ပေမယ့် တွေ့ရခဲတဲ့ ရောဂါတစ်ခုပါ။

ယားယံခြင်း

ယောနိလမ်းကြောင်းကနေ အဖြူဆင်းတာ၊ သွေးဆင်းတာတွေမရှိဘဲ မကြာခဏ မိန်းမကိုယ် ယားယံတာတွေ ဖြစ်တတ်ပါသလား။

ဖြစ်နိုင်ခြေများသော အကြောင်းများ

သန့်စင်လွန်းတာကြောင့် မိန်းမကိုယ် ယားယံတာ ဖြစ်တတ်ပါတယ်။ အမွှေးနံ့ပါတဲ့ ဆပ်ပြာ၊ မိန်းမကိုယ် သန့်စင်ဆေးရည်တွေ အလွန်အကံျွ သုံးစွဲပြီး သန့်စင်တာကြောင့် ထိခိုက်လွယ်သူတွေမှာ မိန်းမကိုယ် ယားယံတာတွေ ဖြစ်လာနိုင်ပါတယ်။

ဆရာဝန်နှင့် ပြသပါ

မိန်းမကိုယ် ယားယံတာကို နေရထိုင်ရခက်လောက်အောင် ခံစားနေရင်၊ မိန်းမကိုယ် ယားယံတာအပြင် အသားအရောင် ပြောင်းလဲတာတွေပါ ဖြစ်လာခဲ့ရင် ဆရာဝန်နဲ့ ပြသဖို့လိုပါတယ်။

Credit : ကျန်းမာရေးအတွက်ဗဟုသုတများ

သင်သိလိုသမျှ ကျန်းမာရေးမေးခွန်းများနှင့် ပတ်သက်၍ Healthcare.com.mm ၏ hotline နံပါတ် 7887 သို့ MPT မိုဘိုင်းလ်ဖုန်းဖြင့် ၂၄ နာရီ အချိန်မရွေး  ခေါ်ဆိုပြီး ဆရာဝန်များနှင့် တိုက်ရိုက်ဆွေးနွေးတိုင်ပင်နိုင်ပါပြီရှင်။