ခါးနာသက်သာစေသောနည်းလမ်း

ခါးနာစေတဲ့ အကြောင်းတွေကများစွာ ရှိပါတယ်။ ဘယ်လိုအကြောင်းတွေကြောင့်ပဲ ခါးနာနာ အောက်ပါနည်းလမ်းတွေက ခါးနာတာ သက်သာအောင် ကူညီပေးနိုင်ပါတယ်။ 

အမြဲလဲလျောင်း မနေပါနှင့်
ခါးနာတာ ခံစားရတဲ့အခါ လှုပ်ရှားမှုမလုပ်ဘဲ လဲလျောင်းအိပ်စက်နေတာက နာကျင်မှုကို ပိုခံစားရပါတယ်။ ဒါ့အပြင် လှုပ်လှုပ်ရှားရှားနေသူတွေထက် နေ့စဉ်လုပ်ငန်း တာဝန်တွေကို လုပ်ဆောင်ရတာလည်း ပိုမိုခက်ခဲတာကို တွေ့ရပါတယ်။ 

လေ့ကျင့်ခန်း လုပ်ပါ
လေ့ကျင့်ခန်းလုပ်တာက ခါးနာတာအတွက် အကောင်းဆုံး ကုသနည်းတစ်ခုပါ။ လမ်းလျှောက်တာက အရိုးရှင်းဆုံး လေ့ကျင့်ခန်းဖြစ်ပြီး ခါးနာတာအတွက် အကောင်းဆုံးဖြေရှင်းနိုင်ပါတယ်။

အနေအထား မှန်ကန်ပါစေ
အများစုက နိစ္စဓူဝလုပ်ငန်းဆောင်တာတွေ လုပ်ဆောင်တဲ့အခါ အနေအထားမမှန်တာကြောင့် ခါးနာတာကို ခံစားကြရပါတယ်။ မှားယွင်းတဲ့ အနေအထားတွေက ကျောရိုးနဲ့ အာရုံကြောတွေပေါ်ကို ဖိအားသက်ရောက်မှုဖြစ်စေပြီး ခါးအပေါ် ဒဏ်ရာသက်ရောက်မှုဖြစ်ပါတယ်။ 

ဆရာဝန်နှင့် ပြသပါ
ခါးနာတာက တာရှည်နေတယ်ဆိုရင်တော့ ဆရာဝန်နဲ့ ပြသစစ်ဆေးဖို့ လိုပါတယ်။ အကိုက်အခဲပျောက်ဆေးတွေ သောက်သုံးတာက နာကျင်မှုကို ခဏတာသက်သာစေနိုင်ပေမယ့် ရေရှည်မှာ ဆေးရဲ့ဘေးထွက်ဆိုးကျိုးတွေကို ခံစားရနိုင်ပါတယ်။ 

ရေခဲ ကပ်ပေးပါ
ခါးနာတဲ့နေရာကို ရေခဲအိတ်ကပ်ပေးတာက ရောင်ရမ်းမှုကို လျော့နည်းစေပြီး နာကျင်မှုကိုလည်း သက်သာစေပါတယ်။ ရေခဲအိတ် ကပ်တဲ့အခါ မိနစ် ၂၀ လောက် ကပ်ထားပြီး ဖယ်ရှားကာ နာရီဝက်နေပါ။ ပြီးမှ မိနစ် ၂၀ ထပ်ကပ်ပေးပါ။

ရေနွေးနဲ့ ရေချိုးပါ
ခါးနာတာက ၂၄ နာရီကျော် သွားပြီဆိုရင်တော့ ရေခဲအိတ်ကပ်တာ ထက် ရေနွေးနဲ့ ရေချိုးပေးတာက ပိုပြီး ထိရောက်မှုရှိပါတယ်။ ရေနွေးနဲ့ မိနစ် ၂၀ ကြာ ရေချိုးတာကြောင့် ကြွက်သားတွေ ပျော့ပျောင်းစေပါတယ်။ ကိုယ်ဝန်ဆောင်ထားရင်တော့ ရေနွေးထဲမှာ အချိန်ကြာကြာစိမ်ပြီး ရေချိုးတာက အချိန်စောမွေးတာ၊ လနုချိန်မှာ ကိုယ်ဝန်ပျက်ကျတာတွေ ဖြစ်စေလို့ မလုပ်သင့်ပါဘူး။ 

မွေ့ရာ အသစ်လဲပါ
ပျော့အိလွန်းပြီး အိပ်လိုက်တာနဲ့ ခန္ဓာကိုယ်နစ်ဝင်သွားတဲ့ မွေ့ရာမျိုးက ခါးနာတာကို ပိုဆိုးစေပါတယ်။

အိပ်ရေးဝ၀ အိပ်စက်ပါ
ညဘက်မှာ အိပ်ရေးဝဝအိပ်ဖို့ အရေးကြီးပါတယ်။ အိပ်စက်တဲ့ အခါ ဘေးတစ်စောင်းအနေအထားနှင့် အိပ်စက်ရမှာဖြစ်ပြီး ဒူးခေါင်းနှစ်ခုကြားမှာ ခေါင်းအုံးတစ်လုံးကို ညှပ်အိပ်ပါ။ ပက်လက်အနေအထားနှင့် အိပ်စက်မယ်ဆိုရင်လည်း ဒူးခေါင်းအောက်မှာ ခေါင်းအုံးကို ခုအိပ်ပါ။

ထိုင်ခုံအနေအထား မှန်ပါစေ
ထိုင်နေကျ ထိုင်ခုံတွေက ခါးအပေါ် ဒဏ်ဖြစ်တဲ့ ထိုင်ခုံမျိုး မဖြစ်ရပါဘူး။ တစ်နာရီထိုင်ပြီးတိုင်း လမ်းထလျှောက်တာမျိုး လုပ်ပေးပါ။

ခါးနောက်မှာ ခုခံပေးပါ
ထိုင်ခံမှာ ထိုင်တာကြာနေရင် ခါးကိုအထောက်အပ့ံပေးနိုင်တဲ့ အခုအခံတစ်ခုခု မရှိခဲ့ရင် တဘက်တစ်ထည်ထည်ကို အလိပ်လိုက် ခေါက်ပြီး ခုံနဲ့ ခါးနေရာကြားမှာ ခုခံပေးပါ။

ရေကူးပါ
ပညာရှင်အများစုက ရေကူးတာဟာ ခါးနာတာအတွက် အကောင်းဆုံး အေရိုးဗစ်လေ့ကျင့်ခန်းတစ်ခုလို့ ထောက်ခံထားကြပါတယ်။ 

ပစ္စည်းတွေကို ဒူးကွေးပြီးမှ မပါ
ကလေးချီတာ၊ ပစ္စည်းတစ်ခုခုကို မတာတွေ ပြုလုပ်တဲ့အခါ ခါးကိုမတ်မတ်ထားပြီး ဒူးကွေးချပြီးမှ မပါ။ ခါးကိုင်းပြီး ကလေးချီတာ၊ ပစ္စည်းမတာမျိုးကို ရှောင်ပါ။ 

ခန္ဓာကိုယ်နှင့်ကပ်ပြီး ပစ္စည်းသယ်ပါ
လေးတဲ့ပစ္စည်းတွေကို သယ်ယူတာ၊ လက်ကဆွဲတာတွေ ပြုလုပ်တဲ့ အခါမှာလည်း သယ်တဲ့ပစ္စည်းကို ခန္ဓာကိုယ်နှင့် ကပ်ပြီး သယ်ယူပါ။

ကိုယ်အလေးချိန် ထိန်းပါ
ကိုယ်အလေးချိန်ကို ထိန်းသိမ်းတာက ခါးပေါ် ဝန်သက်ရောက်မှု ကို လျော့နည်းစေတယ်လို့ ခါးနာတာ မဖြစ်အောင် ကာကွယ်နိုင်ပါတယ်။ ကိုယ်အလေးချိန်များသူတွေအနေနဲ့ ပုံမှန်ကိုယ်အလေးချိန် ရှိသူတွေထက် ခါးနာတာ ဖြစ်နိုင်ခြေ ပိုများပါတယ်။ 

ဆေးလိပ်ဖြတ်ပါ
ဆေးလိပ်က အဆုတ်တစ်ခုတည်းကိုပဲ ဖျက်စီးတာ မဟုတ်ပါဘူး။ ခါးနာတာကိုပါ ဖြစ်စေပါတယ်။ ပြုလုပ်ခဲ့တဲ့ လေ့လာမှုအရ ဆေးလိပ်သောက်သူတွေက ဆေးလိပ်လုံးဝ မသောက်သူတွေထက် ခါးနာတာ ပိုဖြစ်ကြောင်း တွေ့ရှိခဲ့ရတယ်လို့ အမေရိကန်ဆေးပညာဂျာနယ်မှာ ဖော်ပြခဲ့ပါတယ်။ ခါးနာသူတွေအနေနဲ့ ဆေးလိပ်ဖြတ်လိုက်ပါက ခါးနာတာ သက်သာသွားနိုင်တယ်လို့လည်း လေ့လာသူတွေက ပြောပါတယ်။ 

Credit:
ဇာခြည်ဝင်း (ဆေးဝါးတက္ကသိုလ်)
Arogyam magazine, October 2014, Pg. 91-95