ကြွက်တက်ခြင်း

ကြွက်တက်တာကို ကုသမှုအနေနဲ့ ကြွက်တက်တဲ့ ကြွက်သားကို ဆန့်လိုက်ရင် သက်သာသွားပါတယ်။

- အများအားဖြင့် ခြေသလုံးကြွက်တက်ရင် မတ်တတ်ရပ်ပြီး လမ်းလျှောက်လိုက်ရင် သက်သာသွားတတ်ပါတယ်။ ဒါမှမဟုတ် နံရံကိုမှီကာ တံကောက်ကွေးပြီးခြေထောက်ကို ဖြောင့်နေအောင်ခြေသလုံးကြွက်သားကိုဆန့်လိုက်ရင်လည်းသက်သာပါတယ်။နံနက်ရော ညပါ သတိထားပြီး လုပ်ပေးလိုက်ရင် ညအိပ်တဲ့အခါ ကြွက်တက်တာမျိုး မဖြစ်အောင် ကာကွယ်နိုင်ပါတယ်။

- ကြွက်တက်တဲ့အခါ နှိပ်နယ်ပေးရင်လည်း သက်သာစေနိုင်ပါတယ်။ 

- ကြွက်တက်တဲ့နေရာကို ရေနွေးအိတ်တင်ပေးတာကလည်း သက်သာစေပါတယ်။မကြာခဏ ကြွက်တက်တတ်တဲ့သူတွေအနေနဲ့ ခြေထောက်လေ့ကျင့်ခန်းတွေ လုပ်ပေးသင့်ပါတယ်။ ခြေဖဝါးမှာ လုံချည်ချိတ်ထားပြီး ဒူးဆန့်ထားရင်း အဲဒီလုံချည်ကို ဆွဲပေးရင်လညး်ရပါတယ်။
စာရေးတာများလို့ လက်ကြွက်တက်ရင်လည်း ခြေထောက်လိုပဲ လက်ကို ဆန့်ပေးပါ။

- နောက်နည်းတစ်ခုက ခြေသလုံးကြွက်တက်ရင် နှုတ်ခမ်းကို ဆိတ်ပေးရတယ်လို့ ဆိုပါတယ်။ ညာဘက်ခြေသလုံးကြွက်တက်ရင် ညာဘက် အပေါ်နှုတ်ခမ်းကို ဆိတ်ပေးရင် သက်သာတယ်လို့ ဆိုပါတယ်။ အဲဒါကို Acute Punch လို့ခေါ်ပါတယ်။တချို့ကလည်း လက်ညှိုးနဲ့လက်မကြား ကြွက်သားကို အသာလေး နှိပ်ပေးရင် သက်သာစေတယ်လို့ ဆိုပါတယ်။

- ရေဓာတ်ခမ်းခြောက်လို့ ဖြစ်တာဆိုရင် ရေများများသောက်ပေးရပါမယ်။ ဆိုဒီယမ်၊၊ ပိုတက်စီယမ်တွေများများ ပါတာသောက်ပါ။

- ဆေးဝါးတွေပေးဖို့တော့မလိုအပ်ပါဘူး။ တကယ်တမ်းကြွက်တက်လာရင် ဆေးသောက်နေချိန်တောင် မရှိလိုက်ပါဘူး။ ဒါပေမယ့် အမြဲခဏခဏ ဖြစ်တတ်ရင်တော့ ကြွက်သားလျော့စေတဲ့ဆေးတွေ သောက်လို့ရပါတယ်။

- တချို့က ခေါင်းစောင်းနေပြီး လည်ပင်းကြွက်တက်တာမျိုး မကြာခဏ ဖြစ်နေတတ်ပါတယ်။ အရမ်းဆိုးဆိုးရွားရွားဖြစ်နေတယ်ဆိုရင် ခွဲစိတ်လို့လည်းရတာမျိုးမဟုတ်တော့ Botox ဆေးထိုးပေးလို့ရပါတယ်။ အဲ့ဒီဆေးက ထိရောက်မှု ရှိပေမယ့် အာနိသင်က လပိုင်းပဲခံတာကြောင့် တကယ်လို့ပြန်ဖြစ်လာရင် ပြန်ထိုးပေးရပါတယ်။

-အမြဲဆိုသလို ကြွက်တက်နေတတ်ရင်တော့ ညညဆို လေ့ကျင့်ခန်းကို ပုံမှန်လုပ်ပေးသင့်ပါတယ်။ လိုအပ်တဲ့အာဟာရ ဓာတ်တွေ စားပေးရပါမယ်။ အားကစားလေ့ကျင့်ခန်းတွေ လုပ်ရင်လညး် သွေးပူလေ့ကျင့်ခန်းတွေ လုပ်ပေးရပါမယ်။အားကစားလုပ်ပြီးရင်လည်း ထပ်လုပ်ပေးရပါမယ်။ ရေဓာတ်လညး် အလုံလောက်လောက်ရှိနေရပါမယ်။

- အားကစားသမားတွေမှာ ကစားရင်း ကြွက်တက်တာမျိုးတွေ အဖြစ်များတဲ့အတွက် မဖြစ်အောင် လေ့ကျင့်ခန်းကို တစ်နာရီထက်ပိုကြာကြာ လုပ်မယ်ဆိုရင် ရေအပြင် တခြားဓာတ်တွေပါ ဖြည့်ပေးသင့်ပါတယ်။

- မာရသွန်လို အချိန်အကြာကြီးကစားရတဲ့ လေ့ကျင့်ခန်းတွေမှာ ရေဓာတ်တွေ လျော့နည်းပြီး ကိုယ်အလေးချိန် ကျသွားတတ်ပါတယ်။ တကယ်တော့ အားကစားမလုပ်ခင်နဲ့ လုပ်ပြီးချိန်မှာ ကိုယ်အလေးချိန်က နှစ်ရာခို်င်နှုန်းထက်ပိုမကျအောင် ထိန်းရပါတယ်။ ကားပြိုင်ပွဲတွေမှာတောင် ကားထဲ ထိုင်နေရတယ်ဆိုပေမယ့် ချွေးတွေအရမ်းထွက်ရင် ကားပြိုင်ပွဲပြီးချိန်မှာ ကိုယ်အလေးချိန်တွေ လျော့ကျနေတတ်ပါတယ်။ ကို်ယ်အလေးချိန် ၂ ဒသမ ၂၅ ပေါင်ကျသွားတာက ရေ တစ်လီတာ ဆုံးရှုံးသွားတာနဲ့ အတူတူပါပဲ။ 

- အားကစားလုပ်တဲ့နေရာက အပူချိန် ဘယ်လိုရှိတယ်၊ စိုထိုင်းမှု ဘယ်လောက်ရှိတယ်ဆိုတာကို ကြည့်ပြီး ပျမ်းမျှအားဖြင့် တစ်နာရီလှုပ်ရှားတာက ရေ ၁ ဒသမ ၈ လီတာဆုံးရှုံးနိုင်တယ်လို့ ဆိုပါတယ်။ လေ့ကျင့်ခန်းလုပ်ရင် ၃ နာရီလောက်ကြိုြုပီးတော့ ရေသန့်ဘူးတစ်ဘူး သောက်ထားသင့်ပါတယ်။

- အရည်ပဲဖြစ်ဖြစ် ၊ အစားသောက်ပဲဖြစ်ဖြစ် ဆိုဒီယမ်ပါတာကို စားသောက်ထားရင် ရေဓာတ်ကို ပိုထိန်းထားနိုင်ပါတယ်။ တာဝေးအပြေးသမားတွေဆိုရင်လည်း တစ်နာရီဆိုရင် ရေဓါတ် ၁ ဒသမ ၄ လီတာလောက် ကုန်ဆုံးနေတယ်ဆိုတာကို သိထားပြီး ပြန်ဖြည့်ပေးနေဖို့လိုပါတယ်။

- ကာဗိုဟိုက်ဒရိတ်ကလည်း ၁၀ ရာခို်င်နှုန်းထက် မပိုသင့်ပါဘူး။ အားဖြည့် အချိုရည်တွေ သောက်ရင် ကာဗိုဟိုက်ဒရိတ် အများကြီးပါတာ မသောက်သင့်ပါဘူး။ အချိုဓာတ်သိပ်များတာကလညး် မသောက်သင့်ပါဘူး။ အချိုရည် ခုနှစ်ရာခို်င်နှုန်းလောက်က အသင့်တော်ဆုံးလို့ ဆိုပါတယ်။

- တချို့စက်ဘီးပြိုင်ပွဲတွေက တစ်ပြိုက်နက်တည်း ၆နာရီလောက်ပြိုင်ရတာ ရှိပါတယ်။ အဲဒီလူတွေက ၆ နာရီလောက် ဘာမှမစားဘဲဆက်တိုက် စက်ဘီးနင်းရပါတယ်။ သူတို့တစ်တွေကို မနက်အစောပိုင်း အစာအများကြီးစားခိုင်းရပါတယ်။ ၄ နာရီထက် ပိုတဲ့ အားကစားတွေက အာဟာရဓာတ်တွေ ပါလိုအပ်ပါတယ်။ နာရီနည်းနည်းပဲ ပြိုင်တယ်ဆိုရင်တော့ရေဓာတ်လောက်ပဲ ဖြည့်ပေးဖို့ အရေးကြီးတာပါ။

- လေ့ကျင့်ခန်းလုပ်နေတဲ့ အချိန်တွေမှာလည်း အလေးချိန် တစ်ပေါင်လျော့တိုင်း ရေ ၅၀၀ မီလီလီတာ ပြန်သောက်ဖို့ လိုပါတယ်။

- ကိုယ်ဝန်ဆောင်တွေ ကြွက်မတက်အောင် ကတော့ ကယ်လ်စီယမ်နဲ့ မဂ္ဂနီစီယမ် ဖြည့်စွက်စာတွေ လိုအပ်ပါမယ်။ ဆရာတို့နိုင်ငံမှာ ဒီဖြည့်စာတွေ ပိုပြီးတော့ လိုအပ်ပါလိမ့်မယ်။ အဲဒါတွေစားပေးရင် ကိုယ်ဝန်ဆောင်ချိန် ကြွက်တက်တာကို ကာကွယ်ပေးနိုင်ပါလိမ့်မယ်။ ဒီဓာတ်တွေက ကြွက်တက်တာကို ကာကွယ်နိုင်သလို မိခင်နဲ့ ကလေးအတွက်ပါ ကျန်းမာရေးအတွက် လိုအပ်တာတွေလညး် ဖြစ်ပါတယ်။ ဒါပေမယ့် ကိုယ့်ဘာသာမသောက်သုံးဘဲသက်ဆိုင်ရာ ဆရာဝန်တွေနဲ့တော့ အရင်တိုင်ပင်သင့်ပါတယ်။

- ကြွက်မတက်စေဖို့ နောက်ထပ် သတိထားသင့်တာကတော့ အလုပ်တစ်ခုခုကိုလုပ်ရင် အနေအထိုင် ပုံစံတွေ မှန်ကန်စွာ နေထိုင်လုပ်ကိုင်ဖို့ အရေးကြီးပါတယ်။ ခုံမြင့်ဖိနပ်တွေ ရှောင်ပါ။ကွန်ပျူတာ သုံးတဲ့အခါ ထိုင်ခုံ အနိမ့်အမြင့်တွေကစ အဆင်ပြေအောင်ထားပါ။အလုပ်ကို အကြာကြီးဆက်တိုက်မလုပ်ပါနဲ့။ သက်သက်သာသာအနေအထားနဲ့လုပ်ပြီး မကြာခဏ နားနားပေးပါ။ လမ်းထလျှောက်ပေးပါ။ အလုပ်တစ်ခုခုလုပ်ရင် စိတ်ဖိစိးမှုတွေကိုလျှော့ပြီး လုပ်ပါ။ တယောထိုးတာလိုမျိုး တူရီယာ တီးခတ်တယ်ဆိုရင် ပုံစံပြင်မရဘဲ အကြာကြီးနေနေရတဲ့အတွက် ဂရုစိုက်ဖို့ လိုပါလိမ့်မယ်။

- ကြွက်သားဆန့်တဲ့လေ့ကျင့်ခန်းတွေ လုပ်ပေးဖို့ လိုပါတယ်။ အထူးသဖြင့် ညအိပ်ရာဝင်ခါနီး အချိန်တွေမျာ ပုံမှန်လုပ်ပါ။ ညဘက်မှာ ကြွက်တက်တတ်တဲ့သူတွေဆိုရင် တစ်ရေနိုးချိန်တွေမှာပါ အဆင်ပြေရင် ခြေသလုံး ဆွဲဆန့်တဲ့ လေ့ကျင့်ခန်းကို လုပ်ပေးသင့်ပါတယ်။

- ဆေးတွေကို သောက်သလို ညအိပ်ခါနီး နွားနို့သောက်ပေးသင့်ပါတယ်။ မဂ္ဂနီဆီယမ်ကို ဆုံရှုံးစေပါတယ်။ကယ်လ်စီယမ်ကို အများကြီးသောက်ရင်လည်း မဂ္ဂနီဆီယမ် လျော့စေတတ်တာကို သတိထားဆင်ခြင်သင့်ပါတယ်။

-အစိမ်းရောင်အသီးအရွက်တွေ အခွံမာသီးတွေနဲ့ အသားတချို့မှာ မဂ္ဂနီယမ်ဓာတ် ပါပါတယ်။ ဗီတာမင် အီးကလည်း ကြွက်တက်တာကို သက်သာစေပါတယ်။ အသက်ကြီးတဲ့သူတွေမှာ မဂ္ဂနီဆီယမ် မှီဝဲမယ်ဆိုရင် သွေးစစ်ဆေးသင့်ပါတယ်။ကျောက်ကပ်သိပ်မကောင်းရင် မဂ္ဂနီဆီယမ်တွေ အရမ်းမြင့်တက်လာတတ်ပါတယ။်

- နောက်တစ်ခုအရေးကြီးတာက ဗီတာမင်ဒီ ရအောင် နေ့စဉ် နေရောင်ခြည်ထိတွေ့မှု အသင့်အတင့်ခံယူရပါမယ်။ ဗီတာမင်တွေနဲ့ သတ္တုဓာတ်တွေ သောက်သုံးမယ်ဆိုရင်တော့ ဆရာဝန်တွေနဲ့ တိုင်ပင်သင့်ပါတယ်။ လိုအပ်တာထက်ပိုသွားခဲ့ရင် ဗီတာမင်တွေကလညး် အဆိပ်အတောက်ဖြစ်စေတတ်တာကြောင့် ဆရာဝန်နဲ့ တိုင်ပင်ပြီးမှမှီဝဲဖို့ အရေးကြီးတာ ဖြစ်ပါတယ်။

Healthcare.com.mm

Ref: ပါမောက္ခဦးနေဝင်း
အရိုးခွဲစိတ်အထူးကုဆရာဝန်ကြီး