လည်တိုင် ရှည်ရှည်လေးဖြစ်အောင်

လည်ပင်းမှာ ရုန်းဆန့်နိုင်တဲ့ ကြွက်သားအစုအဝေး ရှိပါတယ်။ Sternocleidomastoid muscle, Omohyoideus muscle နဲ့ Trapezius muscle တွေက ခေါင်းရဲ့ လှုပ်ရှားမှုကို ထိန်းချုပ်ထား ပါတယ်။ ကျောရိုးဆစ်တွေကြားမှာ အရိုးနု (cartilage) ဆိုတာရှိလို့ လည်ပင်းရှည်တာ ဖြစ်နိုင်တယ်။ ကြွက်သားကို ပြေလျှော့အောင်လုပ်ပြီး အဆစ်တွေကို ဆန့်နိုင်ရင် အနည်းနဲ့ အများဆိုသလို လည်ပင်းရှည် လာနိုင်တယ်။ လည်တိုင်ရှည်ရှည်လေး
ဖြစ်အောင် လေ့ကျင့်ခန်းကို ဦးစားပေး လုပ်ရမယ်။

ဘာတွေလုပ်မလဲ
(၁) ခါးကိုဆန့်ပြီး ရင်ဘတ်ကို ထုတ်ထားပါ။ ဗိုက်ကို ရှပ်ထားပါ။ ပခုံးကြွက်သားကို လျှော့ထား ပါ။ အသက်ကို ခပ်ဖြည်းဖြည်းရှုပြီး ခေါင်းကို ဘယ်ဖက်ပခုံးပေါ်စောင်းပြီး (၁၀)စက္ကန့် ထားပါ။ ပြီးရင် ပုံမှန်အတိုင်း ပြန်နေပါ။ ဘယ်ပြီးတဲ့ အခါ ညာဖက်ပခုံးပေါ်စောင်းပြီးလုပ်ရမယ်။ (၁၀) စက္ကန့်ကြာ ထားပါ။ တစ်ရက်ကို အနည်းဆုံး သုံးကြိမ် လုပ်ပါ။

(၂) ပုံမှန်အတိုင်း ခါးကိုဆန့်ပြီး ရင်ဘတ်ကို ထုတ်ထားပါ။ ရှေးဦးစွာ ခေါင်းကို နောက်ဖက် တတ်နိုင်သမျှ လှန်ပြီး မျက်နှာကျက်ကို မော့ကြည့်ပါ။ (၁၀) စက္ကန့်ကြာအောင် နေပါ။ ပြီးရင် ခေါင်းကို ရှေ့ကို ပြန်ကွေးပြီး ရင်ညွှန့်နဲ့ မေးရိုးထိအောင်ထား၊ ကြမ်းပြင်ကို (၁၀)စက္ကန့်ကြာ ကြည့်ပါ။ ဒီအတိုင်း အပြန်အလှန် သုံးကြိမ် လုပ်ပါ။

(၃) ခါးကိုဆန့်ပြီး ရင်ဘတ်ကို ထုတ်ပြီး ခါးထောက်ထားပါ။ ခေါင်းကို စက်ဝိုင်းပုံစံ လက်ယာရစ် သုံးကြိမ် လှည့်ပါ။ လှည့်တဲ့အခါ မေးရိုုးနဲ့ ပခုံးကပ်နေရမယ်။ သုံးကြိမ်ပြည့်ရင် လက်ဝဲရစ် ပြန်လုပ်ပါ။

(၄) ကိုယ်လုံးကို ကုတင်ပေါ် ထားပြီး ကုတင်စောင်းနေရာမှ ခေါင်းကို နောက်သို့ လှန်ချပါ။ ပြီးရင် လည်ပင်းရိုးကို တတ်နိုင်သလောက် ဆွဲဆန့်ပြီးနောက် ကျောနဲ့ထိအောင် ကြိုးစားပါ။ 

(၁၅) စက္ကန့်ကြာ ထားပါ။ ပြီးရင် ခေါင်းကို ရှေ့စိုက်ပြီး ရင်ညွှန့်ရိုးနဲ့ မေးစေ့ထိအောင် ထားပါ။ ဒီပုံစံအတိုင်း (၁၅)စက္ကန့် ကြာပါစေ။ ရှေ့နောက်တစ်ကြိမ် လုပ်ပြီးရင် ကုတင်စောင်းကနေ မတ်တပ်ပြန်ရပ်ပြီး ပုံမှန်အတိုင်း နေပါ။ အထက်ပါပုံစံအတိုင်း တစ်ရက်ကို (၃)ကြိမ်ခန့် ပြု လုပ်ပေးရမယ်။အဆိုပါ လေ့ကျင့်ခန်းတွေက သမားရိုးကျ ဂုတ်လေ့ကျင့်ခန်းတွေ ဖြစ်ပါတယ် ။ သွေးပူလေ့ကျင့်ခန်းတွေထဲမှာ လည်းပါတယ်။ ဒီတစ်ခုတည်းလည်း မရသေးဘူး။ သို့သော် အဆိုပါ လေ့ကျင့်ခန်းလောက်နဲ့ မရသေးဘူး။ 

ဆက်လုပ်ရမှာ ရှိသေးတယ်။ ကြွက်သားသဘောက ကြက်ပေါင်လိုဖြစ်တယ်။ ဆန့်ပြီးရင် ပြန်ကျုံ့တတ်ပါတယ်။ ပုံမှန်အားဖြင့် ၁၅မိနစ်ခန့် ကြာပြီးတဲ့အခါ ကြွက်သား က ပြန်ကျုံ့သွားလေ့ရှိတယ်။ အဲလိုမဖြစ်အောင် နောက်လေ့ကျင့်ခန်းတစ်ခု ဆက်လုပ်ဖို့ လိုပါတယ်။ အထက်ကပြောခဲ့တဲ့ လေ့ကျင့်ခန်း(၄)ခု အပြီးမှာ ဒီလေ့ကျင့်ခန်းကို ဆက်လုပ်ပါ။ခေါင်းကို အောက်ဖက်ငုံ့ပြီး လက်ချောင်းနှစ်ဖက်ကို ယှက်ပြီး ခေါင်းပေါ် တင်ထားပါ။ ခေါင်းကို လက်နဲ့ ဖိထားစဉ်မှာပဲ ခေါင်းကို အပေါ်တတ်နိုင်သလောက် ဆန့်ပြီးမော့ပါ။ တစ်ရက်ကို ဆယ်ကြိမ်လောက် လုပ်ပါ။

တခြားနည်းက တဘက်တစ်ထည်ကို လိပ်ပြီး ခပ်ရှည်ရှည်ဖြစ်အောင်လုပ်ပြီး ခေါင်းပေါ် တင်လို့လည်းရတယ်။ စောစောကနည်းလိုပဲ တဘက်နဲ့ ဖိထားစဉ်မှာပဲ ခေါင်းကို အပေါ် တတ်နိုင်သလောက် မော့ပါ။ ဒီနည်းက ဂုတ်ကျောကြွက်သားတွေ သန်မာစေတဲ့နည်းဖြစ်တယ်။ အရပ်ရှည်ချင်သူတွေလည်း သုံးလို့ရတယ်။ တစ်လအတွင်း ၁ စင်တီမီတာလောက် ရှည်လာနိုင်သတဲ့။

Healthcare.com.mm သင့်ကျန်းမာရေး စောင့်ရှောက်ပေး
Credit :
ဒေါက်တာ အေးမင်းထူး