ပုံမှန်အိပ်စက်ခြင်းပုံစံဝင်အောင် ပြန်လည်ထူထောင်ခြင်း

ကောင်းကောင်းအိပ်မပျော်တဲ့ လက္ခဏာကို စိတ်ကျရောဂါမှာ အများအားဖြင့် တွေ့ရတတ်ပါတယ်။ မနက်အစောကြီး တစ်ရေးနိုးလာပြီး (များသောအားဖြင့် မနက် ၃ နာရီပတ်ဝန်းကျင်) ပြန်အိပ်လို့မရတော့တာ အဖြစ်များကြပါတယ်။ ပုံမှန်အိပ်စက်ခြင်းပုံစံဖြစ်အောင်ပြန်လည်ထူထောင်ရာမှာ အိပ်ကောင်းစေတဲ့လမ်းညွှန်ချက်အတိုင်း လေ့ကျင့်ပေးရပါမယ်။ နေ့ခင်းဘက်တွေ၊ ညနေဘက်တွေ၊ အိပ်ရာဝင်ချိန်နဲ့ ညဘက်တွေမှာ လေ့ကျင့်ရပါမယ်။

အိပ်ရာဝင်ချိန်
အိပ်ရာဝင်ခါနီး လုပ်ရမယ့်လှုပ်ရှားဆောင်ရွက်မှုတွေကို ညစဉ်ပုံမှန်လုပ်ပေးဖို့ လိုပါတယ်။ အိပ်ရာဝင်ခါနီး ရေခပ်နွေးနွေး၊ ရေပန်းနဲ့ ရေချိုးတာမျိုး လုပ်ပေးနိုင်ပါတယ်။ အပန်းပြေစေတဲ့ ဂီတသံနားထောင်ပေးတာမျိုးလည်း လုပ်နိုင်ပါတယ်။ အပန်းဖြေတဲ့လေ့ကျင့်ခန်းတွေ လုပ်နိုင်ပါတယ်။ အဲဒီလို လှုပ်ရှားဆောင်ရွက်မှုတစ်ခုကို ညအိပ်ခါနီးအချိန်တိုင်းမှာ ညစဉ်ပုံမှန်လုပ်ပေးခြင်းအားဖြင့် မိမိရဲ့ခန္ဓာကိုယ်ဟာ အကျင့်ပါသွားပြီး အိပ်စက်ဖို့ အသင့်ဖြစ်သွားပါလိမ့်မယ်။

• အိပ်ချင်စိတ်ပေါ်လာတဲ့အချိန်မှာ အိပ်ရာဝင်လိုက်ပါ။
• အိပ်ရာဝင်ချိန်မှာ တီဗီမကြည့်ပါနှင့်တော့။ တစ်ယောက်ယောက်နဲ့ စကားလက်ဆုံကြနေတာမျိုးလည်း မလုပ်ပါနဲ့။ တစ်ယောက်ယောက်နဲ့ ငြင်းခုံစကားများနေတာမျိုးလည်း မလုပ်ပါနဲ့။ အိပ်ရာဝင်ချိန်မှာ ဘာမှမလုပ်တော့ဘဲ အိပ်ရာဝင်လိုက်တာအကောင်းဆုံးပါပဲ။ (အိပ်ရာဝင်ပြီး လိင်ဆက်ဆံမှုလုပ်တာကတော့ လုပ်နိုင်ပါတယ်။ 
• အိပ်ရာပေါ်မှာ အိပ်ခန်းမီးကို ပိတ်ပစ်လိုက်ပါ။ 
• အိပ်ရာပေါ်မှာ လှဲလျောင်းပြီးနောက် အိပ်ဖို့အသင့်ဖြစ်ပြီလို့ ကိုယ့်ကိုယ်ကိုယ် စကားပြောပါ။ ချက်ချင်းအိပ်ပျော်မသွားသေးရင် စိတ်ရောကိုယ်ပါ အနားယူဖြေလျှော့တဲ့ စိတ်လေ့ကျင့်ခန်းလေးတွေ လုပ်ပေးပါ။

ညဘက်
• ညဘက်မှာ တစ်ရေးနိုးလာပြီး ပြန်အိပ်မပျော်ဖြစ်ရင် နာရီဝက်ထက်ပိုပြီး အိပ်ရာထဲ ဆက်လှဲမနေပါနှင့်။ ထပြီး တစ်ခုခုလုပ်လိုက်ပါ။ စာဖတ်တာဖြစ်ဖြစ် ဂီတသံ နားထောင်တာဖြစ်ဖြစ်လုပ်ရင်း အိပ်ချင်စိတ်ပြန်ပေါ်လာရင် ဝင်အိပ်လိုက်ပါ။ 
• အိပ်ရာထချိန်ကို ပုံသေသတ်မှတ်ထားပါ။ ညက အိပ်မပျော်လို့ အစားထိုး အိပ်လိုက်ဦးမယ်ဆိုပြီး နောက်ကျမှ အိပ်ရာထတာမျိုး မလုပ်ပါနဲ့။ ခန္ဓာကိုယ်တွင်း ဇီဝနာရီကို ကမောက်ကမဖြစ်စေပါတယ်။ 
• မိမိအိပ်ခန်းဟာ တခြားအသံတွေ ဆူညံနေတာကို မကာကွယ်နိုင်ဘူးဆိုရင် နားကျပ်တပ်ပြီး အိပ်ပါ။ နားကျပ်မရှိရင် ဂွမ်းဆို့ပြီး အိပ်ပါ။
• အိပ်ဆေးတွေကို ရှောင်ကြဉ်ပါ။ အိပ်ဆေးသောက်ပြီး အိပ်တာဟာ ရေရှည်မှာ အကျိုးမရှိပါဘူး။

Credit:
အောင်အေး (ရန်ကုန်တက္ကသိုလ်)
သင်နှင့်သင့်မိသားစု စိတ်ကျန်းမာရေး ကိုယ်တိုင်စောင့်ရှောက်ပါ စာအုပ်မှကောက်နုတ်ထားပါသည်။