စနစ်တကျစားသောက်ခြင်း

စနစ်တကျစားသောက်ခြင်း 

စနစ်တကျစားသောက်တတ်ဖို့အပြင် ကိုယ်ဟာ အစားလွန်တဲ့အခြေနေကိုရောက်နေပြီလား၊ အလွန်အကြူးစားဖြစ်နေရင်ဘယ်လိုရပ်ရမလဲဆိုတာတွေကို ဒီဆောင်းပါးလေးမှာ မျှဝေပေးထားပါတယ်။ အစာစားတာ ပုံမှန်ထက်ပိုမြန်တယ်၊ စားတဲ့အခါမှာလည်း ဗိုက်ပြည့်အင့်တင်းနေတဲ့အထိ စားမယ်၊ တခြားသူတွေနဲ့ အတူတကွ စားတဲ့အပြင် တစ်ယောက်တည်းလည်း စားတယ်၊ ဗိုက်မဆာတဲ့ အချိန်စားတာတောင် အများကြီးစားမိနေပြီဆိုရင် ခန္ဓာကိုယ်က ပြန်ချေဖျတ်နိုင်တဲ့ ကယ်လိုရီထပ်ပို စားမိနေတဲ လက္ခဏာဖြစ်တာကြောင့် ကိုယ်အလေးချိန်တက်တာ၊ အဝလွန်တာ၊ ကိုယ်လိုချင်တဲ့ body goal မရောက်တာနဲ့ တခြားနောက်ဆက်တွဲတွေ ဖြစ်လာနိုင်ပါတယ်။ ဒါကြောင့် ဒီလိုအစားကြူးနေတဲ့အကျင့်ကြီးကို ရပ်တန့်ဖို့ လိုပါတယ်။ 

၁- အစာဖြည်းဖြည်းစားပါ။ ထမင်းစားနေစဉ်မှာ ရေမကြာခဏသောက်ပေးတာ၊ အစာကို ကြေညက်အောင်ဝါးပြီးမှ မြိုချတာတွေဟာ အစာစားတဲ့ဖြစ်စဉ်ကို နှေးကွေးစေအောင်ဖြစ်ပါတယ်။ ဗိုက်ပြည့်တယ်ဆိုတဲ့ ခံစားချက်ရရှိဖို့ ၁၂ မိနစ်လောက် ကြာတဲ့အတွက် အစာ ဖြည်းဖြည်းစားတာက ဦးနှောက်အတွက် အချိန်ပိုရစေပါလိမ့်မယ်။

၂- သတိထားပါ။ အထူးသဖြင့် တခုခုလုပ်နေရင်း (တီဗွီကြည့်ရင်း၊ စာဖတ်ရင်း) အစာစားရင် ကိုယ်ဘယ်လောက်စားမိမှန်း မသိဘဲ ပိုစားမိတတ်ကြပါတယ်။ ဒါကြောင့်  အစာစားတဲ့အခါ ကိုယ်စားတဲ့ကယ်လိုရီပမာဏကို အာရုံစိုက်မယ်ဆိုရင် အများကြီးမစားမိအောင် သတိဖြစ်စေပါတယ်။ 

၃- ပိုသေးတဲ့ပန်းကန်တွေနဲ့ ပြောင်းစားကြည့်ပါ။ ဦးနှောက်က ပန်းကန်ကိုကြည့်ပြီး လုံလောက်တယ်၊ မလုံလောက်ဘူးဆိုတာကို ဆုံးဖြတ်ပါတယ်။ ဒါကြောင့် ပန်းကန်အရွယ်အစားသေးသေး သုံးမယ်ဆိုရင် အစားသောက်အပြင်အဆင်ကို ပိုပြီးအာရုံစိုက်မိစေတဲ့အတွက် တော်တန်ရုံစားရုံနဲ့ လုံလောက်တယ်ဆိုတဲ့အသိမျိုး ဖြစ်ပေါ်စေပြီး အများကြီး စားချင်စိတ်မဖြစ်တော့ပါဘူး။

၄- အစားသောက်ရွေးစားပါ။ နည်းနည်းစားရုံနဲ့ ကယ်လိုရီအများကြီးတက်တဲ့ အစားသောက်တွေကို ရှောင်ပါ။ ချောကလက်၊ ချိစ်၊ မစ်ရှိတ်စတာတွေပေါ့။ အဲဒါတွေအစား အမျှင်ဓာတ်၊ ပရိုတင်းဓာတ်၊ ရေဓာတ်တွေ အများကြီးပါတဲ့ အစားစာတွေ ဥပမာ ဒိန်ချဉ်၊ အသီးအနှံ၊ အစေ့၊ ပဲ၊ ကြက်သား၊ ငါး စတာတွေကို ရွေးခြယ်စားသောက်မယ်ဆိုရင် ကယ်လိုရီတွေအများကြီးမတက်ဘဲ ပြည့်အင့်တဲ့ခံစားချက်ကိုလည်း ဖြစ်စေပါတယ်။

၅- နောက်ဆုံးတချက်ကတော့ အချိန်မှန်စားပါ။ စားချင်တဲ့အချိန်စားတာ၊ နေ့လယ်စာ (သို့) ညစာ မစားဘဲကျော်သွားတာတွေဟာ အစားပိုစားမိစေပါတယ်။ ဒါကြောင့် နေ့တိုင်း စားနေကျအချိန်မှာ ပုံမှန်စားတတ်တဲ့အကျင့်လုပ်ပါ။

ဒါတွေအပြင် စနစ်တကျစားပါ။ Intermittent fasting အတိုင်းကြိုးစားကြည့်ဖို့လည်း တိုက်တွန်းချင်ပါတယ်။

Intermittent fasting ဆိုတာ ဘာလဲ။

Intermittent fasting ဆိုတာ ဝိတ်ချတဲ့သူတွေအကြားမှာ ပေါ်ပြူလာဖြစ်လာတဲ့ နည်းတစ်ခုပါပဲ။ intermittent ဆိုတဲ့အတိုင်း အချိန်ကာလခြားပြီး fasting အဆာခံတဲ့နည်းပါ။ ပြောရရင် ဘယ်အချိန်မှာ စားပြီး ဘယ်အချိန်မှာတော့ မစားရဘူးဆိုတာကို သတ်မှတ်ပေးထားတာပါပဲ။ ဒီလို အစားသောက်ကို အချိန်သတ်မှတ်ပြီး စနစ်တကျစားတာ၊ ရှောင်တာတွေကြောင့် ဝိတ်ကျစေတယ်၊ အဆီကျစေတဲ့အပြင် ကျန်းမာသက်ရှည်စေတယ်၊ သွေးတွင်းအချိုဓာတ်ကို ထိန်းလာနိုင်တာကြောင့် ဆီးချိုရောဂါလည်း သက်သာစေတယ်ဆိုပါတယ်။ 

Intermittent fasting ဆိုတဲ့နေရာမှာ ပုံစံကွဲတွေ အမျိုးမျိုးရှိပါတယ်။

ကြိုက်တဲ့အချိန် ၈ နာရီအပိုင်းအခြားကို ပုံမှန်စားနေကျ အစားအစာကိုစားပြီး ကျန်တဲ့ ၁၆ နာရီကို အစာမစားဘဲနေတဲ့ ၈း၁၆ နည်း၊ ၄ နာရီစားပြီး နာရီ ၂၀ အစာမစားဘဲနေတဲ့ ၂၀း ၄ နည်းလမ်း၊ တစ်ရက်တိတိ စားနေကျအတိုင်းစားပြီး နောက်နေ့တစ်ရက်လုံး အစားမစားဘဲရှောင်တဲ့  ၂၄ နာရီနည်း၊ ၅ရက်ကို ပုံမှန်စားပြီး  ၂ရက်ကိုတော့ တစ်နေ့ ပျမ်းမျှ ၅၀၀ ကယ်လိုရီထိပဲ စားရတဲ့ ၅း၂ နည်းလမ်း၊ နေ့တိုင်း ၅၀၀ ကယ်လိုရီပဲ ပုံမှန်စားရတဲ့ တစ်လှည့်စီနည်းနဲ့ နောက်ဆုံးအစာစားချိန်ကနေ ၃၆ နာရီတိတိ အစားရှောင်ရတဲ့ ၃၆ နာရီ နည်းလမ်းဆိုပြီး ရှိပါတယ်။ 

ဒီလို စနစ်တကျ အချိန်သတ်မှတ်ပြီး အဆာခံလိုက်တဲ့အခါ မကြာခဏစားဖြစ်တာမျိုးတွေ မရှိတော့ပါဘူး။ သွေးတွင်းအချိုဓာတ်လည်းမတက်တော့ဘူး။ အစာမစားတဲ့အချိန်တွေမှာဆိုရင် လိုအပ်တဲ့ စွမ်းအင်ကို ထုတ်ဖို့အတွက် ခန္ဓာကိုယ်က သိုလှောင်ထားတဲ့အဆီတွေကို ဖြိုခွဲရတဲ့အတွက် အဆီကျလာပါတယ်။ နည်းလမ်းတွေ ပြင်းထန်လေလေ၊ ပိုပြီးထိရောက်လေလို့ ပြောကြပါတယ်။

စလုပ်ကာစမှာတော့ အဆာမခံနိုင်ကြတာတွေ့ရပါတယ်။ အဲဒီအတွက် သစ်သီးဖျော်ရည်သောက်တာ၊ green tea သောက်တာ၊ သစ်သီးစားတာ လုပ်လို့ရပါတယ်။ အကျင့်ဖြစ်သွားရင်တော့ green tea ၊ ရေ၊ ဘလက်ကော်ဖီ လောက်ပဲ သောက်ပါ။ အရေးကြီးတာကတော့ အစာရှောင်ပြီး ပြန်စားတဲ့အချိန်တွေမှာ ဝမ်းသာအားရနဲ့  အချိုတွေ၊ အဆီတွေ၊ စားချင်တာတွေအကုန် အလွန်အကျွံစားရင် ဘာမှထူးမှာမဟုတ်ပါဘူး။  ဒါကြောင့်လည်း intermittent fasting ရယ်၊ diet စနစ်တကျရွေးစားရယ် ပေါင်းပြီးလုပ်ရင် ပိုပြီး ထိရောက်သိသာတဲ့ ရလဒ်ကို ရစေပါတယ်။ ခန္ဓာကိုယ်လှပဖို့အတွက်တင် မဟုတ်ဘဲ ကျန်းမာပြီး fit ဖြစ်ချင်သူတွေအနေနဲ့ ကိုယ်အစားသောက်စားတဲ့ ပုံစံကို စနစ်တကျ ပြောင်းလဲလိုက်မယ်၊ အစားအလွန်အောင် ထိန်းလိုက်မယ်ဆိုရင် ကောင်းတဲ့ပြောင်းလဲမှုတွေ အများကြီးရလာပါလိမ့်မယ်။

ဒေါက်တာစိမ့် (For Your Health For Your Beauty)