ကလေးတွေကို ရင့်ကျက်မှု ရှိအောင် ဘယ်လိုပျိုးထောင်ပေးမလဲ

ကလေးတွေကို ရင့်ကျက်မှု ရှိအောင် ဘယ်လိုပျိုးထောင်ပေးမလဲ
------------------------------------------------------------------------
    ရင့်ကျက်ခြင်းမှာ အမျိုးမျိုးရှိပါတယ်။ ရုပ်ပိုင်း၊ စိတ်ပိုင်း၊ စာရိတ္တပိုင်း ၊ လူမှုရေးပိုင်းနဲ့ ဉာဏ်ရည် ရင့်ကျက်မှု ဆိုပြီး ခွဲခြား ကြည့်ရှုလို့ရပါတယ်။ ကလေးငယ်ဘဝမှာ အမှီအခိုကင်းပြီး တာဝန်ယူတတ်တဲ့ လူကြီးဖြစ်လာဖို့ကို ပျိုးထောင်ပေးသင့်ပါတယ်။  ဒီလိုလူကြီးမျိုးဖြစ်လာအောင် ဘယ်လို ပျိုးထောင်ရမလဲ ဆိုတာ ဖော်ပြပေးလိုက်ရပါတယ်။

(၁) မိမိကိုယ်ကို အားကို တတ်ပါစေ
----------------------------------------
    ကလေးအတွက် အကုန်လိုက်လုပ်ပေးဖို့မလိုပါဘူး။ အဝတ်အစားဝတ်တာ ၊ ဖိနပ်ကြိုးချည်တာ၊ ကျောင်းသွားဖို့ လွယ်အိတ်ပြင်ဆင်တာ စတာတွေကို ကိုယ်တိုင်လုပ်ပါစေ။ လူကြီး လုပ်ပေးရင် မြန်တာ မှန်ပေမယ့် ကိုယ့်အားကိုကိုးစိတ်ပေါ်အောင် ကလေးတွေကို အချိန်ပေးပြီး လုပ်ခိုင်းသင့်ပါတယ်။

(၂)ကိုယ်တိုင်ရွေးခြယ်ခွင့်ပေး။
------------------------------------
    ကလေးငယ်တွေကို အဝတ်အစား၊ အရုပ် ၊ ဝါသနာ စတာတွေကို ကိုယ်တိုင်ရွေးချယ်ခွင့်ပေးသင့်ပါတယ်။ သူ တို့ ရွေးချယ်မှုကို အကြံပေး ၊ ဆွေးနွေးတာမျိုး ပဲ လုပ်ပေးသင့်ပါတယ်။ ကိုယ်က ပိုသိတယ်ဆိုပြီး ရွေးချယ်ပေးတာမျိုးမလုပ်သင့်ပါဘူး။

(၃) ကလေးကို တစ်ယောက်ထဲ သွားလာခွင့်ပေးပါ။
----------------------------------------------------------
    ကလေး သွားတဲ့ နောက်ကို အမြဲတမ်း လိုက်စရာ မလိုပါဘူး။ ကလေး ကြီးပြင်းလာတာနဲ့ အမျှ ကျောင်းသွားတာ ကျောင်းကားစီး စတာတွေကို တယောက်ထဲ သွားလာခွင့်ပေးသင့်ပါတယ်။ ကိုယ်လိုက်ပို့ရင် စိတ်မပူရဘူးဆိုပေမယ့် ကလေး တွေ ကြီးပြင်းလာပြီး စည်းကမ်းတွေကို သိလာတဲ့ အခါမျိုးမှာ သွားလာခွင့်ပေးသင့်ပါတယ်။ သူှုှုငယ်ချင်းတွေ စုပြီး သွားလာတာမျိုးကိုလည်း ခွင့်ပြုပေးသင့်ပါတယ်။


(၄)မိမိကိုယ်ကို ထိန်းချုုပ်နိုင်အောင်သင်ပေးပါ။
-----------------------------------------------------
    ကလေးတွေဟာ စိတ်ခံစားလွယ်ပြီး ထိန်းချုပ်နိုင်စွမ်းနည်းပါတယ်။ အော်ဟစ်ခုန်ပေါက်ပြီး ပျော်တတ်သလို စူးစူးဝါးဝါးလည်း အော်ငိုတတ်ပါတယ်။ ကလေးတွေသာ တစ်ခုခု အလိုမကျတာနဲ့ အော်ငိုပြီး စိတ်ကောက်တတ်ပါတယ်။ ကလေးတွေကို သိတတ်လာတဲ့ အချိန်မှာ ကိုယ့်စိတ်ကို ဘယ်လို ထိန်းချုပ်မလဲ ဆိုတာ သင်ကြားပြသသင့်ပါတယ်။

(၅)စည်းကမ်းရှိအောင်သင်ပေးပါ။
-------------------------------------
    ကလေးတွေကို မိဘ နောက်ကလိုက်ကြည့်နေမှ မဟုတ်ဘဲ စည်းကမ်းကို ကိုယ်တိုင်လိုက်နာတတ်အောင်သင်ပေးရပါမယ်။ အိပ်ယာမဝင်ခင် သွားတိုက်တာ ၊ အရုပ်တွေကို ပြန်သိမ်းတာ ၊ အိမ်စာ လုပ်တာ စတာ တွေကို ကိုယ့်စည်ကမ်းနဲ့ကို လုပ်တာမျိုးဖြစ်အောင် ပြုစု ပျိုးထောင်ပေးသင့်ပါတယ်။
 
(၆) ကိုယ်ကိုယ်တိုင် ဖြေတတ်အောင် သင်ပေးပါ။
----------------------------------------------------
    ကလေးတွေကို မေးတဲ့ မေးခွန်းတွေကို သူတို့ကိုယ်တိုင် ဖြေပါစေ။ ဒီ အချက်ဟာ သူတို့ ဉာဏ်ရည်နဲ့ လူမှု ဆက်ဆံရေးကို တိုးတက်စေမှာ ဖြစ်ပါတယ်။ ဒီလို မဟုတ်ဘဲ ကိုယ်ကပဲ ကြားဝင်ဖြေပေးနေမယ်ဆို ကလေး က ရှက်ရွံ့တဲ့ လူအဖြစ် ကြီးပြင်းလာနိုင်ပါတယ်။

(၇) ကလေးးကို အကျိုးအကြောင်းသင့်  ရှင်းပြပါ။
---------------------------------------------------------
    ကလေးကို အပြစ်ပေးတဲ့ အခါမှာ အကျိုးသင့် အကြောင်းသင့် ရှင်းပြပါ။ ကလေးတွေ အနေနဲ့ သူတို့ အမှားလုပ်မိလို့ အပြစ်ပေးခံရတယ်ဆိုတာ သိရှိဖို့လိုပါတယ်။ သူတို့ရဲ့ လုပ်ရပ်တိုင်းမှာ အကျိုးဆက်ရှိတယ်ဆိုတာကို သဘောပေါက်ဖို့လိုပါတယ်။ ရှင်းပြတဲ့ အခါမှာ အော်ဟစ်ဆူပူတာမျိုးမဟုတ်ပဲ တည်တည်ငြိမ်ငြိမ်ရှင်းပြဖို့လိုပါတယ်။

(၈) ကလေးတွေ အမှားလုပ်မိပါစေ
--------------------------------------
    ကလေးတွေကို တင်းတင်းကျပ်ကျပ်မထိန်းချုပ်ပါနဲ့။ အန္တရာယ်ရှိတဲ့ အရာတွေကို ရှင်းပြပါ။ တခြားကိစ္စတွေမှာ ကလေးကို လွတ်လပ်ခွင့်ပေးသင့်ပါတယ်။ အမှားလုပ်မိရင် ကိုယ်တိုင်သိရှိပြီး အမှားကနေ သင်ခန်းစာယူပါစေ။


(၉)ကိုယ်တိုင် စဉ်းစားတွေးခေါ်တတ်ပါစေ
-----------------------------------------------
    ကလေးတွေအနေနဲ့ အခြေအနေတစ်ခုအပေးမှာ ကိုယ်တိုင် စဉ်းစားတွေးခေါ်တတ်တာ အကျိုးရှိပါတယ်။ သူတို့ ကိုယ်တိုင်စဉ်းစားပြီး ကိုယ်ပိုင် အတွေးအခေါ်ရှိလာပါစေ၊ သူတို့ အတွေးအခေါ်ကိုလည်း လွတ်လွတ်လပ်လပ် ထုတ်ဖော်ပြောဆိုတတ်အောင် ကူညီပေးပါ။

(၁၀) အမြဲတမ်း ကလေး တစ်ယောက်လို မဆက်ဆံပါနဲ့
--------------------------------------------------------------
    ကလေးသုံးနှစ်ပြည့်တဲ့ အခါမှာ တစ်ချို့ အလုပ်တွေ လုပ်တတ်အောင်စသင်လို့ရပါပြီ။ ဥပမာ အရုပ်တွေ စနစ်တကျ ပြန်သိမ်းတာမျိုးပါ။ အရွယ်ကြီးလာတာနဲ့ အမျှလုပ်နိုင်တဲ့ အိမ် အလုပ်တွေကို တိုးပြီးသင်ပေးပါ။ ဒီလို သင်ပေးခြင်းက ကလေးကို စည်းကမ်းနဲ့ နိုးကြားထကြွမှု ရှိအောင် လုပ်ပေးပါလိမ့်မယ်။ ဒါအပြင် လူအများကို ကူညီတတ်ပြီး လေးစားမှု ရှိတဲ့ လူ တစ်ယောက်အဖြစ် ကြီးပြင်းလာစေနိုင်ပါတယ်။

Dr.Aung