ကိုယ်ဝန်ဆောင်မိခင်များ သက်သောင့်သက်သာရှိစေဖို့ လေ့ကျင့်ခန်းလေးလုပ်ကြစိ...

          ကိုယ်ဝန်ဆောင်ချိန်ကာလမှာ မိခင်လောင်းတွေအနေနဲ့ အနေအထိုင်အသွားအလာနဲ့ အစားအသောက်ကို အထူးဂရုစိုက်လုပ်ဆောင်ကြရပါတယ်။ ကိုယ်ဝန်ဆောင်ချိန်မှာ လှုပ်ရှားသွားလာမှုကို ခါတိုင်းထက်ပိုပြီး ဂရုစိုက်ရတယ်ဆိုတာ လှုပ်ရှားသွားလာမှုကို ဆင်ခြင်ဂရုစိုက်ဖို့သာဖြစ်ပြီး အရင်ကထက် အသွားအလာနည်းသွားရဖို့သာဖြစ်ပြီး အရင်ကထက် အသွားအလာနည်းသွားရဖို့ လိုတယ်လို့ ဆိုတာမဟုတ်ပါဘူး။

          ကိုယ်ဝန်ဆောင်မိခင်တွေ မပေါ့မပါးနေ့ရက်တွေကို ဖြတ်ကျော်နေရချိန်မှာ ကိုယ်လက်ညောင်းညာကိုက်ခဲနေရတာတွေ၊ စိတ်နဲ့ခန္ဓာကိုယ် ပင်ပန်းနွမ်းလျနေရတာတွေ သက်သာလျော့ပါးစေဖို့ လွယ်ကူသက်သာပြီး ဘေးကင်းစိတ်ချရတဲ့ ကိုယ်လက်လှုပ်ရှား လေ့ကျင့်ခန်းလေးတွေ ပုံမှန်လေးလုပ်ဆောင်ပေးသင့်ပါတယ်။ ဒီလိုကိုယ်လက်လှုပ်ရှားမှုလေးတွေ ပြုလုပ်ပေးမှသာ ရင်သွေးလေးလောကထဲရောက်မလာခင်အချိန်အထိ ကိုယ်ဝန်ဆောင်မေမေတို့ သက်သောင့်သက်သာရှိရှိနေထိုင်နိုင်ပြီး မွေးဖွားတဲ့အခါမှာလည်း နာကျင်မှုသက်သာစေကာ မွေးရဖွားရပိုပြီး အဆင်ပြေချောမွေ့စေမှာ ဖြစ်ပါတယ်။

၁။ လိပ်ပြာလေ့ကျင့်ခန်း

          ဗိုက်ထဲက ရင်သွေးလေးကို ကျန်းကျန်းမာမာနဲ့ မွေးဖွားနိုင်စေဖို့ရာအတွက် အလွယ်ကူဆုံးလေ့ကျင့်ခန်း ဖြစ်ပါတယ်။ ကိုယ်ဝန်ဆောင်စဉ် ဖောရောင်မှုကို လျှော့ချပေးနိုင်ပြီး မွေးဖွားချိန်နာကျင်မှုကို သည်းခံနိုင်စွမ်းရှိစေကာ မွေးဖွားရလွယ်ကူစေဖို့ အကျိုးပြုတဲ့ လေ့ကျင့်ခန်းဖြစ်ပါတယ်။

·         ကြမ်းပြင်မှာ တင်ပျဉ်ခွေထိုင်ပါ။

·         ဒူးနှစ်ဖက်ကွေးထားပြီး ခါးကို တည့်တည့်မတ်မတ်ထားပါ။

·         လက်တွေကို ဒူးတစ်ဖက်စီပေါ်တင်ထားပါ။

·         အသက်ရှုထုတ်ချိန်မှာ ဒူးတွေကို အပေါ်မ၊ အောက်ချနဲ့ လှုပ်ရှားပေးပါ။

·         အသက်ရှုသွင်းချိန်မှာတော့ ဒူးတွေကို ရင်ဘတ်လောက်ထိ မတင်ပေးပါ။

·         ဒီနည်းအတိုင်း ၁၅ ကြိမ်ကနေ အကြိမ် ၂၀လောက်ပြုလုပ်ပေးပါ။

၂။ ကြောင် - ကုလားအုတ်ဟန် အကြောဆန့် လေ့ကျင့်ခန်း

          ခါးနာတာတွေ၊ ခါးမှာတင်းကျင်နေတာတွေကို ဖြေလျော့ပေးပြီး ကျောရိုးညွတ်ပြောင်းမှုနဲ့ သန်စွမ်းမှုကိုလည်း တိုးတက်စေပါတယ်။

·         လက်နှစ်ဖက်နဲ့ ဒူးနှစ်ဖက်ကို ကြမ်းပြင်မှာ ထောက်ထားပါ။

·         လက်တွေက ပခုံးနဲ့ တစ်ပြေးတည်းရှိနေရမှာဖြစ်ပြီး ဒူးတွေကလည်း တင်နဲ့ တစ်ပြေးတည်းရှိနေရမှာပါ။

·         အသက်ရှုသွင်းလိုက်တာနဲ့ ဦးခေါင်းကို ဖြည်းဖြည်းချင်းမော့လိုက်ပြီး မျက်ခုံးနှစ်ဖက်ကြားထဲသို့ ကြည့်ပေးပါ။

·         အသက်ရှုထုတ်လိုက်ချိန်မှာ ခါးကို ကွေးမြှင့်လိုက်ပြီး မော့ထားတဲ့ခေါင်းကို ဖြည်းဖြည်းချင်းပြန်ငုံ့ပေးပါ။

·         လက်တွေကို ကြမ်းပြင်မှာ အားပြုထောက်ရင်း ခါးရဲ့အလယ်ပိုင်းကို မျက်နှာကြက်ဆီ မှန်းပြီး တတ်နိုင်သမျှ ကွေးညွှတ်ကာ တွန်းထုတ်ပေးထားပါ။

·         ဒီပုံစံကို နေ့စဉ်တစ်ကြိမ်လောက် ကိုယ်စွမ်းသလောက်အချိန်အတိုင်းအတာလေးသတ်မှတ်ပြီး ပြုလုပ်ပေးနိုင်ပါတယ်။

၃။ ကေဂယ်လေ့ကျင့်ခန်း

          ဒီလေ့ကျင့်ခန်းက သားအိမ်၊ ဆီးအိမ်နဲ့ အူမကြီးတို့ကို ထောက်ပံ့ပေးထားတဲ့ ကြွက်သားတွေသန်စွမ်းစေပါတယ်။ ဒီလေ့ကျင့်ခန်းကို ပုံမှန်လေးလုပ်ပေးထားမယ်ဆိုရင် ကလေးမွေးဖွားချိန် ညှစ်ထုတ်တဲ့အခါ ကြွက်သားတွေကို ထိန်းချုပ်ရ အဆင်ပြေစေပြီး လွယ်ကူစွာနဲ့ မွေးဖွားစေနိုင်မှာဖြစ်ပါတယ်။

          လေ့ကျင့်ခန်းလုပ်ချိန်မှာ လေ့ကျင့်ရမယ့် ကြွက်သားနေရာကို သိရှိဖို့ ခက်ခဲနိုင်ပါတယ်။ ဆီးသွားနေချိန်မှာ ခဏလောက်ထိန်းပြီး ရပ်သွားအောင် ကြိုးစားကြည့်ပါ။ တင်ပါးဆုံရိုးကွင်းကြွက်သားကို လေ့ကျင့်ပေးဖို့ပဲ ဖြစ်ပါတယ်။ နောက်ပိုင်း ကျင့်သားရသွားပြီဆိုရင် ထိုင်နေချိန်မှာပဲဖြစ်ဖြစ်၊ မတ်တတ်ရပ်နေချိန်မှာပဲဖြစ်ဖြစ် လေ့ကျင့်ခန်းပေးသွားနိုင်မှာ ဖြစ်ပါတယ်။

၄။ ဝမ်းဗိုက်လေ့ကျင့်ခန်း

          ဒီလေ့ကျင့်ခန်းက ဝမ်းဗိုက်ကြွက်သားတွေကို ပိုသန်မာစေပြီး ကလေးမွေးဖွားတဲ့အခါ ဝမ်းဗိုက်ကြွက်သားတွေ တွန်းညှစ်ရတာကို ပိုပြီးထိရောက်စေပါတယ်။ ကိုယ်ဝန်ဆောင်ချိန် တစ်လျှောက်လုံး လေ့ကျင့်နိုင်တဲ့ လေ့ကျင့်ခန်းဖြစ်ပါတယ်။

·         ခြေနှစ်ဖက်ကို တင်ပါးအကျယ်လောက်ခွာပြီး မတ်တတ်ရပ်ပါ။

·         လက်နှစ်ဖက်ကို ဦးခေါင်းနောက်မှာထားပါ။

·         အသက်ရှုသွင်းလိုက်ပြီး တံတောင်နေရာတွေပိုပြီး ဖွင့်ထုတ်လိုက်ပါ။

·         အသက်ရှုထုတ်လိုက်ပြီး ကိုယ်ကိုရှေ့ဘက်ကိုင်းချပေးပါ။

·         ခါးနေရာမှာ ခုံးနေပေမယ့် လည်ပင်းကုပ်ပိုးနေရာကိုတည့်အောင် သတိပြုပေးပါ။

·         ပြီးရင် ချက်နေရာကို အတွင်းဘက် သို့မဟုတ် ကျောဘက်ကိုမှန်းပြီး ကျုံ့သွင်းပေးပါ။

·         အသက်ပြန်ရှုသွင်းလိုက်ပြီး မူလအနေအထားအတိုင်း ပြန်နေပါ။

·         ဒီလေ့ကျင့်ခန်းကို ၁၂ ကြိမ်ကနေ ၁၅ ကြိမ်လောက်ပြုလုပ်ပေးပါ။

၅။ ဘေးတိုက်ခြေမတင် လေ့ကျင့်ခန်း

          ဒီလေ့ကျင့်ခန်းက မခက်ခဲလှဘဲ တင်ပါးနဲ့ကိုယ်ထည်ကို သန်မာစေပြီး ကြွက်သားတောင့်တင်းမှုကို ပြေလျော့စေပါတယ်။ ကိုယ်ဝန်ဆောင်စဉ် ခြေဖနောင့်ပုံမမှန်ဖြစ်တာကိုလည်း သက်သာပျောက်ကင်းစေပါတယ်။

·         ကြမ်းပြင်မှာ တစ်ဖက်စောင်းလှဲအိပ်ပြီး လက်တစ်ဖက်ကို ခေါင်းအောက်ထားကာ ကျန်တစ်ဖက်ကို ကြမ်းပြင်မှာထောက်ရင်း ခန္ဓာကိုယ်ကို ထိန်းထားပေးပါ။

·         အသက်ပြင်းပြင်းရှုလိုက်ပြီး အပေါ်ဘက်ရောက်နေတဲ့ ခြေထောက်ကို ဆန့်တန်းလျက် မတင်လိုက်ပါ။

·         ဒီအနေအထားအတိုင်း တောင့်ထားပြီး ၁၀ကြိမ်လောက်အသက်ရှုသွင်းရှုထုတ်လုပ်ပြီးမှ ခြေထောက်ကို ပြန်ချပါ။

·         ခြေတစ်ဖက်စီကို ငါးကြိမ်စီပြုလုပ်ပေးရမှာ ဖြစ်ပါတယ်။

၆။ လမ်းလျှောက်လေ့ကျင့်ခန်း

          ကိုယ်ဝန်ဆောင်မိခင်အတွက် အကောင်းဆုံးလေ့ကျင့်ခန်းကတော့ လမ်းလျှောက်လေ့ကျင့်ခန်းပဲ ဖြစ်ပါတယ်။ အိမ်မှာ လမ်းလျှောက်ရတာ အဆင်မပြေလှဘူးဆိုရင် ပန်းခြံမှာ လမ်းလျှောက်တာအပြင် ဈေးဝယ်စင်တာမှာလည်း မကြာခဏ ဈေးဝယ်ထွက်ရင်း လမ်းလျှောက်ပေးနိုင်ပါတယ်။ လမ်းလျှောက်တာနဲ့ ကိုယ်လက်လှုပ်ရှားမှုတွေကို ခဏခဏလုပ်ပေးတာက ကိုယ်ဝန်ဆောင်စဉ် ကိုယ်အလေးချိန်တက်လာတာကို ထိန်းပေးထားနိုင်ပြီး ကိုယ်ဝန်ဆောင်လို့နာကျင်ကိုက်ခဲမှုတွေကိုလည်း ပြေလျော့သက်သာစေပါတယ်။ လမ်းလျှောက်တာက ကိုယ်ဝန်ဆောင်တာကြောင့် ခြေလက်တွေဖောရောင်တာမျိုးကိုလည်း လျှော့ချပေးပါတယ်။ ကိုယ်ဝန်ဆောင်မိခင်လမ်းလျှောက်ပေးတာကြောင့် စိတ်ရောကိုယ်ပါ ပင်ပန်းမှုတွေကို သက်သာလျော့ပါးစေပြီး စိတ်ဖိစီးမှုဒဏ်တွေကိုလည်း ပြေလျော့စေပါတယ်။ သတိပြုရမှာကတော့ ကိုယ်ဝန်ဆောင်မိခင်သွေးပေါင်ချိန်များနေတဲ့အချိန်၊ မွေးဖွားဖို့ ဗိုက်နာလာချိန်နဲ့ ပုံမှန်မဟုတ်တဲ့ သွေးဆင်းချိန်တွေမှာ လမ်းလျှောက်တာမျိုးကို ရှောင်ကြဉ်ပေးရမှာဖြစ်ပါတယ်။

Credit : သံသာ