ဦးနှောက်ကျန်းမာရေးအတွက် စားသောက်ကြမယ်

ဘယ်သူပဲဖြစ်ဖြစ် ကျန်းမာရေးအတွက် စားသောက်ဖို့သင့်တော်တဲ့ အစားအသောက်အုပ်စုကတော့ မြေထဲပင်လယ် အစားအသောက်အုပ်စုထဲမှာ ပါဝင်တဲ့ အစားအစာတွေနဲ့ DASH အုပ်စုဝင် အစားအသောက်တွေပဲ ဖြစ်ပါတယ်။ ဘာ့ကြောင့်မှန်ဆိုတာ သေသေချာချာ မသိရသေးပေမဲ့ ဒီအုပ်စုထဲပါဝင်တဲ့ အစားအသောက်တွေကို စားသုံးရင် အသက်ကြီးလာတဲ့အခါ အာရုံကြောပျက်စီးတဲ့ ရောဂါတစ်ခုဖြစ်တဲ့ အယ်လ်ဇိုင်းမားရောဂါဖြစ်နိုင်ခြေကို ၅၃% လောက်ထိ လျှော့ချပေးနိုင်တယ်လို့ဆိုပါတယ်။

အကြမ်းဖျင်းအားဖြင့် ဒီလိုဦးနှောက်အတွက် အကျိူးဖြစ်ထွန်းစေမဲ့ အစားအသောက်အုပ်စုမှာ အမျိုးအစား ၁၀ မျိုးလောက်ပါဝင်ပါတယ်။ ဒါတွေကတော့

- အစိမ်းရောင်ဟင်းသီးဟင်းရွက်များ

- သစ်သီးဝလံအမျိုးမျိုး

- ပဲအမျိုးမျိုး

- ဘယ်ရီသီးများ

- အစေ့အဆံများ

- ငါးအမျိုးမျိုး

- ဂျုံကြမ်း

- ကြက်သား၊ ဘဲသား

- သံလွင်ဆီ

- ဝိုင်အနီ စတာတွေပါဝင်ပါတယ်။ 

ခန္ဓာကိုယ်အတွက် မရှိမဖြစ်လိုအပ်တဲ့ ပရိုတင်းဓာတ်ကို ကြက်သား၊ ဘဲသား၊ ငါး စတဲ့အသားအမျိုးမျိုး စားသုံးခြင်းကနေ ရရှိနိုင်ရုံသာမက တကယ်လို့ အသားငါးမစားချင်ဘူးဆိုရင် ပဲအမျိုးမျိုးစားသုံးခြင်းကနေလည်း ရရှိနိုင်ပါတယ်။ ငါးတို့ ကြက်သား၊ ဘဲသားတို့ကိုလည်း အမြဲစားစရာမလိုပါဘူး၊ တစ်ပတ်ကို တစ်ခါ၊ ၂ ခါလောက် စားရင်ကိုလုံလောက်ပါတယ်။ ဒီအစားအစာတွေထဲမှာ အသားဓာတ်လို့ခေါ်တဲ့ ပရိုတင်းဓာတ်အပြည့်အဝပါဝင်ပြီး ပြည့်ဝဆီပမာဏလည်း နည်းနည်းပဲ ပါဝင်တာကြောင့် ကျန်းမာရေးအတွက်စားသုံးဖိို့သင့်တော်ပါတယ်။

ကျန်းမာရေးအတွက် ဟင်းသီးဟင်းရွက်တွေက ဘယ်လောက်ကောင်းသလဲဆိုတာတော့ အထူးပြောစရာ လိုမယ်မထင်ပါဘူး၊ ဟင်းသီးဟင်းရွက်ထဲမှာမှ ဟင်းနုနယ်၊ ကိုက်လန်၊ ပန်းဂေါ်ဖီစိမ်း စတာတွေက အထူးကိုကောင်းမွန်ပါတယ်။ ဒါတွေကို ကြော်ပဲစားစား၊ သုပ်ပဲစားစား ဘယ်လိုစားစား စားလို့ရပါတယ်။

ဘယ်သူပဲဖြစ်ဖြစ်မုန့်ပဲသရေစာ စားသောက်ရတာကြိုက်နှစ်သက်ကြပါတယ်။ ဒီလိုစားသောက်တဲ့အခါ တခြားအပြင်စာတွေစားမဲ့အစား ဘယ်ရီသီးလေးတွေ၊ စတော်ဘယ်ရီသီးတွေ၊ ဒါမှမဟုတ်လည်း ပဲအမျိုးမျိုးပါတဲ့အထုပ်ကလေးတွေ ဝယ်ထားပြီး အဆာပြေစားပေးတာက ကိုယ်အလေးချိန်လည်း ထိန်းပေးရာရောက်ရုံမက ဦးနှောက်ကျန်းမာရေးအတွက်လည်း အများကြီး အကျိုးရှိစေမှာပါ။

ဝိုင်အနီကတော့ ကျန်းမာရေးအတွက်ကောင်းတယ်ဆိုပေမဲ့ ပမာဏနဲ့လည်းသက်ဆိုင်ပါတယ်။ အကောင်းဆုံးကတော့ အမျိုးသားတွေအနေနဲ့ တစ်နေ့ကိုတစ်ခွက်၊ အမျိုးသမီးတွေအနေနဲ့ တစ်နေ့ ၂ ခွက်လောက်သောက်ရင် အနေတော်ပါပဲ။ ဒီထက်ပိုများသွားရင်တော့ ဦးနှောက်ကျန်းမာရေးကို ထိခိုက်စေနိုင်ပါတယ်။ 

သံလွင်ဆီကို ပေါင်မုန့်နဲ့ သုပ်စားတာ၊ အသီးအရွက်တွေနဲ့ သုပ်စားတာ ဒါမှမဟုတ် ဟင်းသီးဟင်းရွက်တွေ ကြော်လှော်ရင် တခြားဆီမသုံးပဲ သံလွင်ဆီနဲ့ ကြော်လှော်တာ ဒီလိုနည်းလေးတွေနဲ့ စားသုံးနိုင်ပါတယ်။ လေ့လာချက်တွေအရတော့ ကာလကြာရှည်သံလွင်ဆီ စားသုံးခဲ့မယ်ဆိုရင် အသက်ကြီးလို့ မှတ်ဉာဏ်ထိခိုက်တာမျိုးတွေကို ကာကွယ်ပေးနိုင်တယ်လို့ ဆိုပါတယ်။ 

ဘာတွေစားရမလဲဆိုတာ သိပြီးပြီဆိုတော့ ဘာတွေရှောင်ရမလဲဆိုတာ ပြောပြပါမယ်။ အဓိကရှောင်စေချင်တာကတော့ အနီရောင်ရှိတဲ့ အသားတွေဖြစ်ပါတယ်၊ ဘယ်လိုအသားတွေဆိုရင် အမဲသား၊ ဝက်သား လိုအသားတွေ ဖြစ်ပါတယ်။ နောက်ပြီး လုံးဝကို ရှောင်ရှားသင့်တာတစ်ခုက အသင့်စား၊ အမြန်စား အစားအစာတွေ ဖြစ်ပါတယ်။ ဒီအစားအစာတွေက ရုတ်တရက်ကြည့်လိုက်ရင် စားချင်စရာ၊ သားရည်ယိုချင်စရာကောင်းသလို စားလိုက်ရင်လည်း စိတ်ကျေနပ်မှုကို ဖြစ်စေပါတယ်၊ သို့ပေမဲ့ သူတို့ထဲမှာ ကာဘိုဟိုက်ဒရိတ်ဓာတ်တွေ လိုတာထပ်၊ သုံးနိုင်တာထပ်ပိုပါဝင်နေသလို စားပြီး မကြာခင်မှာတင် ဗိုက်ပြန်ဆာစေပါတယ်။ ဒါ့ကြောင့် ဒီလိုကျန်းမာရေးအတွက် အကျိုးမရှိတဲ့အစားအစာတွေကို တတ်နိုင်သလောက်မစားကြပါနဲ့လို့ မှာကြားရင်းနဲ့ နိဂုံးချုပ်အပ်ပါတယ်ခင်ဗျာ။

Dr. Oliver