အမျိုးသမီးများနဲ့ ဗီတာမင်

          အမျိုးသမီးတွေမှာ သန်စွမ်းကျန်းမာဖို့၊ လှပကြော့ရှင်းဖို့ မရှိမဖြစ်လိုအပ်တဲ့ ဗီတာမင်တွေ ရှိပါတယ်။ အောက်ပါဗီတာမင်တွေကို လုံလောက်စွာ စားသုံးသောကြောင့် နုပျိုလှပပြီး ကျန်းမာတဲ့အမျိုးသမီးတစ်ယောက်အဖြစ် ဂုဏ်ယူဝံ့ကြွားစွာ ရပ်တည်နိုင်မှာ ဖြစ်ပါတယ်။

၁။ ဗီတာမင် အေ

          ဗီတာမင်အေက အင်တီအောက်ဆီးဒင့်လို့ခေါ်တဲ့ ဓါတ်တိုးဆန့်ကျင်ပစ္စည်းဖြစ်ပြီး အမျိုးသမီးတိုင်း အရိုးနဲ့သွားတွေ သန်မာဖို့၊ တစ်သျှူး၊ အရေပြား၊ အချွဲမြှေးလွှာတွေအတွက် မရှိမဖြစ်လိုအပ်ပါတယ်။ ဗီတာမင်အေကနေ နာတာရှည်နာမကျန်းဖြစ်နိုင်ခြေကို လျှော့ချနိုင်တာ၊ အမြင်အာရုံကောင်းမွန်စေတာ၊ အိုမင်းမှုကို လျော့နည်းစေတာနဲ့ ခုခံစွမ်းအားကောင်းမွန်စေတာစတဲ့ ကောင်းကျိုးတွေရရှိနိုင်ပါတယ်။

ရရှိနိုင်သော အရင်းအမြစ်

          မုန်လာဥနီ၊ ရွှေဖရုံသီး၊ ကညွတ်၊ ခရမ်းချဉ်သီး၊ ဖရဲသီး၊ မာလကာသီး၊ ပန်းဂေါ်ဖီစိမ်း၊ ကိုက်လန်၊ သင်္ဘောသီး၊ သစ်တော်သီး၊ ငရုတ်သီး၊ ဟင်းနုနယ်၊ ကြက်ဥ၊ အသည်း၊ နို့နဲ့ ဗီတာမင်အေဖြည့်စွက်ထားတဲ့ ကွေကာတွေကနေ ဗီတာမင်အေကို ရရှိနိုင်ပါတယ်။

၂။ ဗီတာမင် ကေ

          ဗီတာမင် ကေက အရိုးတွေကို သန်မာစေ၊ အသက်ကြီးသူတွေမှာ ပုံမှန်သွေးခဲမှုကို ထိန်းသိမ်းထားတာနဲ့ နှလုံးရောဂါဖြစ်နိုင်ခြေကို လျှော့ချပေးတာစတဲ့ အာနိသင်တွေ ပေးစွမ်းနိုင်ပါတယ်။ ခန္ဓာကိုယ်ခုခံစွမ်းအားနဲ့ စွမ်းအင်ရရှိဖို့အတွက်လည်း ဗီတာမင် ကေ လိုအပ်ပါတယ်။

ရရှိနိုင်သော အရင်းအမြစ်

          ကောက်နှံကွေကာ၊ အစိမ်းရင့်ရောင် ဟင်းသီးဟင်းရွက်၊ ပဲပိစပ်ဆီနဲ့ ငါးကြီးဆီတို့ကနေ ဗီတာမင်ကေကို ရရှိနိုင်ပါတယ်။

၃။ ဗီတာမင် ဒီ

          ဗီတာမင်ဒီက အဆီပျော်ဝင်ဗီတာမင်ဖြစ်ပြီး ကယ်လ်စီယမ်နဲ့ ဖော့စဖရပ်စုပ်ယူမှုကို အားပေးပါတယ်။ ဗီတာမင်ဒီက အရိုးအဆစ်ရောင်ရမ်းနာကျင်မှုနဲ့ ကင်ဆာရောဂါတချို့ ဖြစ်ပွားမှုမှ ကာကွယ်ပေးပါတယ်။ ဗီတာမင်ဒီက ဓမ္မတာမလာမီခံစားရတဲ့ဝေဒနာတွေကို သက်သာစေပြီး အမြင်အာရုံမပျက်စီးအောင်လည်း ကာကွယ်ပေးပါတယ်။ ဗီတာမင်ဒီချို့တဲ့ပါက အရိုးတွေအားနည်းပြီး အရိုးပွတာကို ဖြစ်စေပါတယ်။

ရရှိနိုင်သော အရင်းအမြစ်

          နေ့စဉ် နေရောင်ခြည်နဲ့ ခဏတာမျှ ထိတွေ့ရုံနဲ့ ခန္ဓာကိုယ်အတွက် လိုအပ်တဲ့ ဗီတာမင်ဒီပမာဏကို ရရှိနိုင်ပါတယ်။ အဆီများတဲ့ ငါး၊ ဗီတာမင်ဒီဖြည့်စွက်ထားတဲ့ နို့၊ အသည်းနဲ့ ဥအမျိုးမျိုးတွေက ဗီတာမင်ဒီကို ရရှိနိုင်ပါတယ်။

၄။ ဗီတာမင် စီ

          ဗီတာမင် စီက ခန္ဓာကိုယ်ခုခံစွမ်းအားကို ကောင်းမွန်စေတာကြောင့် အမျိုးသမီးတွေရဲ့ ကျန်းမာရေးအတွက် မရှိမဖြစ်ပါ။ ဗီတာမင်စီက အနာကျက်မြန်စေတာ၊ တစ်သျှူးတွေ ကြီးထွားမှုမြန်စေတာ၊ ကင်ဆာဖြစ်နိုင်ခြေ၊ နှလုံးရောဂါဖြစ်နိုင်ခြေတွေကို လျော့နည်းစေပါတယ်။ သွေးနီဥဆဲလ်တွေ ဖြစ်ပေါ်စေဖို့အတွက် ဗီတာမင်စီက မရှိမဖြစ်ပါ။

ရရှိနိုင်သော အရင်းအမြစ်

          ပန်းဂေါ်ဖီစိမ်း၊ ဂရိတ်ဖရုသီး၊ ကီဝီသီး၊ လိမ္မော်သီး၊ ငရုပ်ကောင်း၊ အာလူး၊ စတော်ဘယ်ရီသီး၊ ပဲပင်ပေါက်နဲ့ ခရမ်းချဉ်သီးတွေကနေ ဗီတာမင်စီကို ရရှိနိုင်ပါတယ်။

၅။ ဗီတာမင် အီး

          ဗီတာမင် အီးက ဇရာကို အန်တုနိုင်တဲ့ အာနိသင်ရှိပြီး ဆဲလ်တွေ ပျက်စီးမှုမှ ကာကွယ်ပေးပါတယ်။ ဗီတာမင် အီးက နှလုံးရောဂါ၊ အတွင်းတိမ်၊ မှတ်ဉာဏ်ချို့ယွင်းတာနဲ့ ကင်ဆာတချို့ဖြစ်ပွားမှုမှ ကာကွယ်နိုင်ပါတယ်။ ဗီတာမင် အီးက ဆံသားနဲ့ အရေပြားကျန်းမာမှုအတွက်လည်း မရှိမဖြစ်လိုအပ်ပါတယ်။

ရရှိနိုင်သော အရင်းအမြစ်များ

          ကောက်နှံကွေကာ၊ အစေ့အဆန်၊ ဟင်းနုနယ်၊ မာဂျရင်း၊ ပြောင်းဖူးဆီ၊ ငါးကြီးဆီ၊ မြေပဲထောပတ်၊ နေကြာစေ့တို့ကနေ ဗီတာမင်အီးကို ရရှိနိုင်ပါတယ်။

၆။ ဗီတာမင် ဘီ - ၆

          ခန္ဓာကိုယ်ခုခံစွမ်းအားစနစ်အတွက် ဗီတာမင် ဘီ - ၆ လိုအပ်ပါတယ်။ ဟော်မုန်းတွေနဲ့ ဦးနှောက်မှ ဓာတုပစ္စည်းတွေထုတ်လုပ်ရာ ဗီတာမင် ဘီ- ၆ က ကူညီပေးတာကြောင့် စိတ်ဓာတ်ကျနိုင်ခြေ၊ နှလုံးရောဂါဖြစ်နိုင်ခြေနဲ့ မှတ်ဉာဏ်ချို့ယွင်းနိုင်ခြေတွေကို လျော့နည်းစေပါတယ်။ သွေးတွင်းသကြားဓာတ် တည်ငြိမ်အောင်လည်း လုပ်ဆောင်ပေးပါတယ်။ ဗီတာမင် ဘီ - ၆ က ကိုယ်ဝန်ဆောင်ချိန် ခံစားရတတ်တဲ့ ပျို့တာ၊ အန်တာစတာတွေကို သက်သာစေပါတယ်။ သွေးအားနည်းတာကိုလည်း သက်သာစေပါတယ်။

ရရှိနိုင်သော အရင်းအမြစ်

          ဗီတာမင် ဘီ- ၆ ဖြည့်စွက်ထားတဲ့ကွေကာ၊ ထောပတ်သီး၊ ငှက်ပျောသီး၊ အသား၊ ပဲအမျိုးမျိုး၊ ငါး၊ အုတ်ဂျုံနဲ့ အစေ့အဆန်တွေကနေ ဗီတာမင် ဘီ - ၆ ကို ရရှိနိုင်ပါတယ်။

၇။ ဗီတာမင် ဘီ - ၇ (ဘိုင်အိုတင်)

          ခန္ဓာကိုယ်မှာ ဂလူးကို့စ်နဲ့ အဆီဖြစ်ပေါ်မှုအတွက် မရှိမဖြစ်လိုအပ်ပါတယ်။ ချွေးဂလင်းတွေကို ထိန်းပေးတာကြောင့် ဆံသားနဲ့ အရေပြားကို ကျန်းမာစေပါတယ်။ အရိုးတွေ ကြီးထွားဖို့နဲ့ ရိုးတွင်းခြင်ဆီအတွက် လိုအပ်ပြီး သွေးတွင်းအဆီဓာတ်ပုံမှန်ဖြစ်အောင် ထိန်းပေးပါတယ်။ ဘိုင်အိုတင် ချို့တဲ့ပါက နှလုံးလုပ်ငန်းပုံမှန်မဖြစ်တာ၊ သွေးအားနည်းတာ၊ စိတ်ဓာတ်ကျတာနဲ့ သွေးတွင်းကိုလက်စထရော မြင့်တက်တာတွေ ဖြစ်စေပါတယ်။

ရရှိနိုင်သော အရင်းအမြစ်

          ငါး၊ အာလူး၊ မုန်လာဥနီ၊ ငှက်ပျောသီး၊ အဝါရောင်သစ်သီး၊ အစိမ်းရင့်ရောင် ဟင်းသီးဟင်းရွက်၊ ဆန်လုံးညို၊ ငရုတ်ကောင်း၊ ဥအနှစ်၊ အုတ်ဂျုံ၊ ပဲပိစပ်၊ နို့၊ ချိစ်၊ ဒိန်ချဉ်နဲ့ အစေ့အဆန်တွေကနေ ဘိုင်အိုတင်ကို ရရှိနိုင်ပါတယ်။

၈။ ဗီတာမင် ဘီ - ၁၂

          အမျိုးသမီးတွေအတွက် မရှိမဖြစ်လိုအပ်တဲ့ နောက်ထပ်ဗီတာမင်တစ်ခုကတော့ ဗီတာမင် ဘီ - ၁၂ ပါပဲ။ ဇီဝရုပ်ဖြစ်ပျက်မှု၊ ဆဲလ်ပွားများမှု၊ ပရိုတင်းတည်ဆောက်မှုတို့အတွက် ဗီတာမင် ဘီ - ၁၂ က မရှိမဖြစ်ပါ။ ဦးနှောက်နဲ့ အာရုံကြောတွေ ကျန်မာအောင် ထိန်းပေးတာကြောင့် စိတ်ဓာတ်ကျရောဂါ ကုသရာမှာ အသုံးပြုပါတယ်။ ဗီတာမင် ဘီ - ၁၂ ချို့တဲ့ပါက စိတ်တိုစိတ်ဆတ်တာ၊ စိတ်ဓာတ်ကျတာ၊ စိတ်ရှုပ်ထွေးတာ၊ လျှာနဲ့ ပါးစပ်ရောင်တာတွေ ဖြစ်စေပါတယ်။

ရရှိနိုင်သော အရင်းအမြစ်

          ချိစ်၊ ဥအမျိုးမျိုး၊ အသား၊ နို့၊ ဒိန်ချဉ်တွေကနေ ဗီတာမင် ဘီ - ၁၂ ကို ရရှိနိုင်ပါတယ်။

၉။ ဗီတာမင် ဘီ - ၂ (ရိုင်ဘိုဖလေဗင်)

          ကျန်းမာရေးကောင်းဖို့၊ ပုံမှန်အတိုင်းကြီးထွားဖွံ့ဖြိုးဖို့နဲ့ ဇီဝရုပ်ဖြစ်ပျက်မှုအတွက် ရိုင်ဘိုဖလေဗင် လိုအပ်ပါတယ်။ ရိုင်ဘိုဖလေဗင် ချို့တဲ့ပါက ခုခံစွမ်းအားနဲ့ အာရုံကြောစနစ်တွေ အားနည်းသွားတာကြောင့် အမြင်မှုန်ဝါးတာ၊ လည်ချောင်းနာတာ၊ ပါးစပ်မှာ အနာပေါက်တာ၊ နှုတ်ခမ်းကွဲတာ၊ ဆံသားခြောက်တာ၊ အရေးကြောင်းဖြစ်တာနဲ့ အရေပြားယားယံတာတွေ ဖြစ်နိုင်ပါတယ်။

၁၀။ ဘီတာမင် ဘီ - ၉ (ဖောလစ်အက်စစ်)

          အမျိုးသမီးတွေမှာ ဖောလစ်အက်စစ်က မရှိမဖြစ်လိုအပ်ပါတယ်။ နှလုံးရောဂါ၊ သွေးဖိအား၊ အယ်လ်ဇိုင်းမားရောဂါ၊ စိတ်ဓာတ်ကျရောဂါ၊ ကင်ဆာနဲ့ မှတ်ဉာဏ်ချို့ယွင်းမှုတွေမဖြစ်အောင် ဖောလစ်အက်စစ်က ကာကွယ်ပေးနိုင်ပါတယ်။ ဦးနှောက်နဲ့ အာရုံကြောတွေ ကျန်းမာဖို့၊ မျိုးအောင်နိုင်စွမ်းကောင်းမွန်ဖို့၊ ကိုယ်ဝန်ဆောင်ချိန် သန္ဓေသားမှာ မွေးရာပါ ချို့ယွင်းချက်မရှိဖို့အတွက်က ဖောလစ်အက်စစ်ကို အလုံအလောက်ရရှိဖို့ လိုပါတယ်။ ကိုယ်ဝန်ဆောင်ချိန်မှာ ဖောလစ်ချို့တဲ့ပါက သန္ဓေသားမှာ မွေးရာပါကျောရိုးမ ချို့ယွင်းချက်ပါလာတတ်ပါတယ်။

ရရှိနိုင်သော အရင်းအမြစ်

          အစိမ်းရင့်ရောင် ဟင်းသီးဟင်းရွက်၊ လိမ္မော်ရည်၊ ကညွတ်၊ ဖရဲသီး၊ စတော်ဘယ်ရီသီး၊ ဖောလိတ်ဖြည့်စွက်ထားတဲ့ ကွေကာ၊ ပဲနွယ်ပဲညွန့်၊ ပဲအမျိုးမျိုး၊ ဒိန်ချဉ်နဲ့ ဥအမျိုးမျိုးကနေ ဖောလိတ်ဓာတ်ကို ရရှိနိုင်ပါတယ်။

Credit : နန်းသီရိ(ဆေးဝါး)