ဆယ်ကျော်သက်အရွယ်မှာ ကိုယ်ဝန်မရစေဖို့

ပညာရှာသင့်တဲ့ ဆယ်ကျော်သက်အရွယ်မှာ လိင်ပိုင်းဆိုင်ရာ အသိပညာတွေ သိထားတယ်ဆိုရင် ကြိုတင်ကာကွယ်မှုတွေ လုပ်နိုင်ပါတယ်။ လိင်အသိပညာပေးခြင်းနဲ့ ဆယ်ကျော်သက်ကိုယ်ဝန်ဆောင်ခြင်းက တစ်ခုနဲ့ တစ်ခု ဆက်စပ်နေပါတယ်။ လိင်နဲ့ ပတ်သက်တဲ့ အသိပညာရှိမယ်ဆိုရင် ဆယ်ကျော်သက်အရွယ်မှာ ကိုယ်ဝန်ရတဲ့ အဖြစ်တွေကို လျော့ကျစေပါတယ်။ နောက်ဆုံးပြုလုပ်ခဲ့တဲ့ လေ့လာမှုတွေအရလည်း ပြည့်စုံတဲ့ အသိပညာပေးခြင်းကြောင့် ဆယ်ကျော်သက်အရွယ်မှာ ကိုယ်ဝန်ဆောင်ရတဲ့ ကိစ္စတွေ ကျဆင်းသွားတယ်ဆိုတာ တွေ့ရပါတယ်။ ကျောင်းတွေ ကောလိပ်တွေမှာ လိင်အသိပညာပေးခြင်းကြောင့်ဆယ်ကျော်သက် ကိုယ်ဝန်တစ်ခုထဲကိုသာ ကာကွယ်ပေးနိုင်တာ မဟုတ်ပါဘူး။ ဆယ်ကျော်သက်တွေကြားမှာ လိင်ဆက်ဆံမှု ကနေတဆင့် ကူးစက်တတ်တဲ့ ရောဂါတွေ (STDs) ကို လည်း ပျံ့ပွားခြင်းမရှိရအောင် တားဆီးပေးနိုင်ပါတယ်။ ဒီတစ်ပတ် လိင်ပညာပေးအဖြစ် ဆယ်ကျော်သက် အရွယ်လေးတွေ ပန်းကောင်းအညွှန့်ကျိုးမဖြစ်ရအောင် ကိုယ်ဝန်ဆောင်မှု ဘယ်လိုကာကွယ် တားဆီးနိုင်မလဲဆိုတာကို ဖော်ပြပေးလိုက်ပါတယ်။

ပဋိသန္ဓေတားဆီးခြင်းအကြောင်း အသိပေးခြင်း

လိင်အသိပညာပေးရာမှာ ဆယ်ကျော်သက်တွေအနေနဲ့ သားဆက်ခြားဆေး (သို့မဟုတ်) ပဋိသန္ဓေတားဆေးတွေနဲ့ သူတို့ အသုံးပြုပုံတွေကို ရှင်းရှင်းလင်းလင်း နားလည်ထားမယ်ဆိရင် ပိုပြီးထိရောက်မှုရှိပါတယ်။ အမေရိကန်နိုင်ငံ ရောဂါထိန်းချုပ်ရေးဌာန (CDC) က ပြုလုပ်ခဲ့တဲ့ လူငယ်တွေရဲ့ အလေ့အထနဲ့ပတ်သက်တဲ့ စစ်တမ်းတစ်ခုအရ လူငယ်တွေကြားမှာ ပဋိသန္ဓေတားဆီးရေး နည်းလမ်းတွေကို ထိထိရောက်ရောက် အသုံးချမှုရှိမယ်ဆိုရင် ဆယ်ကျော်သက်အရွယ်မှာ ကိုယ်ဝန်ဆောင်ရခြင်းကို ၈ဝ ရာခိုင်နှုန်း
အထိလျှော့ချနိုင်တယ်လို့ သိရပါတယ်။ တနည်းပြောရမယ်ဆိုရင် ပဋိသန္ဓေတားဆီးမှုနဲ့ ပတ်သက်လို့ ပညာပေးခြင်းကြောင့် ကိုယ်ဝန်ဖျက်ချမှု နှုန်းကိုလည်း လျှော့ချပေးနိုင်မှာ ဖြစ်ပါတယ်။ ဒါပေမယ့် ဆယ်ကျော်သက် အများစုဟာ သူတို့အတွက်ရွေးချယ်စရာနည်းလမ်းတွေနဲ့ အဲဒါတွေရဲ့ ထိရောက်မှုကို မသိကြသေးပါဘူး။

လိင်ကိစ္စနှင့် ပတ်သက်သော အခြေခံအကြောင်းအရာများ ပညာပေးခြင်း

လိင်အသိပညာပေးခြင်းမှာ လိင်မှုကိစ္စအပေါ် ဘယ်လိုသဘောထားသင့်သလဲ ဆိုတာလည်းပါဝင်ပါတယ်။ လိင်မှုကိစ္စနဲ့ ပတ်သက်လို့ ပိုမိုကောင်းမွန်စွာ အသိပညာပေးလာခြင်းကြောင့် ၁၉၉၁ ခုနှစ်က စပြီးကြည့်မယ်ဆိုရင် ဆယ်ကျော်သက် ကိုယ်ဝန်ဆောင်ခြင်း ၂ဝ ရာခိုင်နှုန်း ကျဆင်းလာခဲ့တယ်လို့ CDC ရဲ့ စစ်တမ်းက ဆိုပါတယ်။ ဆယ်ကျော်သက်အရွယ်မှာ ကိုယ်ဝန်ရတဲ့ ကိစ္စတွေရဲ့ အများစုက ပဋိသန္ဓေတားခြင်းနဲ့ ပတ်သက်လို့ ဗဟုသုတ မရှိကြတာ ကြောင့် ဖြစ်ပါတယ်။ ဒါကြောင့် ဆယ်ကျော်သက်တွေကို လိင်အသိပညာပေးတဲ့အခါမှာ မျိုးဆက်ပွားကျန်းမာရေး အကြောင်းကို ဦးစားပေးသင့်ပါတယ်။ ဆယ်ကျော်သက်အရွယ်မှာ ကိုယ်ဝန်ရှိလာတာကြောင့် ပညာတစ်ပိုင်းတစ်စနဲ့ ကျောင်းထွက်လိုက်ရတာ မျိုးတွေရှိနိုင်သလို လူမှုအသိုင်းအဝိုင်းမှာလည်း အဆင်မပြေမှုတွေကြုံတွေ့ရနိုင်ပါတယ်။

ပြည့်စုံသော လိင်အသိပညာပေးခြင်း

ပြည့်စုံတဲ့ လိင်အသိပညာပေးခြင်းရဲ့ အရေးပါမှုကို ဒီကိစ္စကို ရှောင်ကျဉ်ဖို့အတွက်သာ ပညာပေးခြင်းနဲ့ နှိုင်းယှဉ်ပြီးတော့ အမေရိကန်နိုင်ငံ ဝါရှင်တန် တက္ကသိုလ်က လေ့လာမှုတစ်ခုပြုလုပ်ခဲ့ပါတယ်။ ဒီလိုလေ့လာကြည့်တဲ့နေရာမှာ ပြည့်စုံတဲ့ လိင်အသိပညာပေးမှုကို ရရှိခဲ့သူဟာ ဆယ်ကျော်သက် အရွယ်မှာကိုယ်ဝန်ရနိုင်ခြေ ၆ဝ ရာခိုင်နှုန်း ပိုနည်းတယ်ဆိုတာ တွေ့ရှိခဲ့ရပါတယ်။ ပြည့်စုံတဲ့ လိင်အသိပညာပေးခြင်းက လိုအပ်ပါတယ်။ ဒါမှသာလျှင် ဆယ်ကျော်သက်တယောက်အနေနဲ့ ကျွမ်းကျင်သူ ဆေးပညာရှင်နဲ့ အချိန်မီပြနိုင်ဖို့ကို ရှက်ကြောက်တွန့်ဆုတ်နေခြင်း မဖြစ်တော့မှာပါ။ အချိန်မီ ပြသတိုင်ပင်မှု မလုပ်တာကြောင့် နောက်ကျသွားပြီး ကိုယ်ဝန်ပျက်ကျတာတွေ၊ ကလေးအသေမွေးဖွားတာတွေ ကနေတဆင့် အဲဒီဆယ်ကျော်သက် မိန်းကလေးရဲ့ မျိုးပွားအင်္ဂါတွေ ထိခိုက်ပျက်စီးတာမျိုး ဖြစ်လာနိုင်ပါတယ်။ တချို့သူတွေမှာ သွေးအားနည်းတာနဲ့ သွေးတက်တာတွေ အမြဲတမ်းဖြစ်သွားနိုင်ပါတယ်။ ဘာကြောင့်လဲဆိုတော့ ဆယ်ကျော်သက် မိန်းကလေးတစ်ယောက် အနေနဲ့ သူ့ရဲ့ ဖွံ့ဖြိုးမှုက ပြည့်စုံခြင်း မရှိသေးပါဘူး။ အချိန်မတိုင်မီ ကိုယ်ဝန်ဆောင်လိုက်ရခြင်းကြောင့် သူ့ကိုယ်ခန္ဓာမှာ ပြောင်းလဲတွေ့ကြုံလာတဲ့အတိုင်း အပြည့်အဝချိန်ညှိနိုင်ခြင်း မရှိသေးတဲ့ မျိုးပွားစနစ်တွေကို ထိခိုက်စေပါတယ်။ ဒါကြောင့် ဆယ်ကျော်သက်မှာ ကိုယ်ဝန်ရှိတာမျိုးကို ဂရုတစိုက်နဲ့ ဖြေရှင်းရမှာဖြစ်ပါတယ်။ မိဘတွေနဲ့ ပတ်ဝန်းကျင် အသိုင်းအဝိုင်းကလည်း ရုပ်ပိုင်းဆိုင်ရာအရရော၊ စိတ်ပိုင်းဆိုင်ရာအရပါ အကူအညီပေးရမှာ ဖြစ်ပါတယ်။ ဒီလိုမှမဟုတ်ရင် စိတ်ထိခိုက်မှုကနေတဆင့်ကြောင့် လူတောမတိုးဝံ့တာမျိုးတွေ ဖြစ်သွားနိုင်ပါတယ်။ ဘဝရဲ့တာဝန်နဲ့ သူတို့ကိုယ်တိုင်
ဆောင်ရွက်ရမှာတွေ ရှိလာပြီဆိုတာ သိအောင်လုပ်ပေးမှသာ အဆင်ပြေသွားမှာဖြစ်ပါတယ်။


Source: 
onlymyhealth

 သင်သိလိုသမျှ ကျန်းမာရေးမေးခွန်းများနှင့် ပတ်သက်၍ Healthcare.com.mm ၏ hotline နံပါတ် 7887 သို့ MPT မိုဘိုင်းလ်ဖုန်းဖြင့် ၂၄ နာရီ အချိန်မရွေး  ခေါ်ဆိုပြီး ဆရာဝန်များနှင့် တိုက်ရိုက်ဆွေးနွေးတိုင်ပင်နိုင်ပါပြီရှင်။