သက်သတ်လွတ်စားသူများ မမေ့သင့်သည့် အာဟာရဓာတ်ခြောက်မျိုး

(၁) ပရိုတင်း

ပရိုတင်းဟာ ခန္ဓာကိုယ်တည်ဆောက်ဖို့အတွက် အရေးပါဆုံးသော အာဟာရဖြစ်ပါတယ်။
လူကြီးတစ်ယောက်အတွက် လိုအပ်ချက်ပမာဏဟာ နေ့စဉ် ခန္ဓာကိုယ်အလေးချိန် တစ်ကီလိုဂရမ်အတွက် ဝ.၈ ဂရမ်ဖြစ်ပါတယ်။ ကြီးထွားမှုနှေးတဲ့ ယောကျ်ားလေးတွေ
အနေနှင့် နေ့စဉ် ကိုယ်အလေးချိန် တစ်ကီလိုဂရမ်အတွက် တစ်မှ ၁.၂ ဂရမ် လိုအပ်ပါတယ်။ သက်သတ်လွတ်စားသူတွေအနေနှင့် ခန္ဓာကိုယ်အတွက် လိုအပ်တဲ့ အမိုင်နိုအက်ဆစ်တွေ အများဆုံးပါဝင်တဲ့ ပရိုတင်းအမျိုးအစားကို စားသုံးဖို့အရေးကြီး
ပါတယ်။ ပဲအမျိုးမျိုး၊ ကောက်နှံတစ်ခုလုံးပါဝင်စာ၊ အခွံမာသီးနဲ့ အစေ့အဆန်တွေဟာ အမျိုးအစား ကောင်းမွန်တဲ့ ပရိုတင်းတွေပါ။

(၂) ဗီတာမင် B12

ဗီတာမင် B12 ဟာ လူ့ခန္ဓာကိုယ်အတွက် အရေးပါတဲ့ ဗီတာမင်တစ်မျိုးဖြစ်ပြီး အသားထုတ်ကုန်တွေမှာ အဓိကပါဝင်ပါတယ်။ ဗီတာမင် B12 ဟာ ဦးနှောက်
လုပ်ငန်းဆောင်တာနှင့် အာရုံကြောစနစ်အတွက် အလွန်အရေးကြီးပါတယ်။
ဟေမိုဂလိုဘင် တည်ဆောက်ဖို့အတွက်လည်း လိုအပ်ပြီး သွေးအားနည်းမှု မဖြစ်အောင်လည်း ကာကွယ်ပေးပါတယ်။ အပင်ထွက်အစားအစာတွေမှာ
ဗီတာမင် B12 ပါဝင်မှုဟာ အလွန်နည်းတဲ့အတွက် သက်သတ်လွတ်စားသူတွေ
အနေနဲ့ အားဖြည့်ဆေးတွေကို မှီဝဲသင့်ပါတယ်။

(၃) သံဓာတ်

သံဓာတ်ဟာ လူု့ခန္ဓာကိုယ်အတွက် အလွန်အရေးပါတဲ့ သတ္တုဓာတ်တစ်မျိုး
ဖြစ်ပါတယ်။ ဟေမိုဂလိုဘင် တည်ဆောက်ဖို့အတွက် အသုံးဝင်ပြီး သံဓာတ်မရှိခဲ့ရင်
သွေးအားနည်းတာ၊ မောပန်းတာနဲ့ ကြီးထွားမှု ပျက်စီးတာတွေဖြစ်နိုင်ပါတယ်။
အပင်မှ ရရှိတဲ့ သံဓာတ်ဟာ အသားမှရရှိတာနဲ့ နှိုင်းယှဉ်ရင် ပမာဏ အလွန်နည်းပြီး စုပ်ယူမှုနှုန်းလည်း နှေးကွေးတဲ့အတွက် သက်သတ်လွတ်စား သူတွေဟာ သံဓာတ်ချို့တဲ့လေ့ ရှိပါတယ်။ သံဓာတ်ဟာ ဗီတာမင် C နဲ့ အတူတွဲပြီး စားသုံးရင် ခန္ဓာကိုယ်မှ စုပ်ယူမှု ပိုကောင်းစေပါတယ်။ ဒါကြောင့် သံဓာတ်ပါဝင်တဲ့ ပဲအမျိုးမျိုး ဗီတာမင် C များစွာပါဝင်တဲ့ ဟင်းသီးဟင်းရွက် သစ်သီးဝလံတွေနဲ့ အတူတူတွဲပြီး စားသုံးရင် ခန္ဓာကိုယ်မှ သံဓာတ်စုပ်ယူမှု ပိုမိုကောင်းမွန်နိုင်ပါသည်။ ဒါပေမဲ့ သံဓာတ်ပါဝင်တဲ့ အစားအစာတွေကို ကော်ဖီ ဒါမှမဟုတ် လက်ဖက်ရည်နှင့်အတူ တွဲစပ်ပြီး မစားသုံးသင့်ပါ။ သံဓာတ်စုပ်ယူမှုကို အနှောက်အယှက် ဖြစ်စေ
တတ်တာကြောင့်ပါ။

(၄) ကယ်လ်စီယမ်နှင့် ဗီတာမင် D

သက်သတ်လွတ်စားပြီး နို့နဲ့ နို့ထွက်ပစ္စည်းကိုပါ ရှောင်မယ်ဆိုရင် ကယ်လစီယမ် ရရှိဖို့ တခြားဟင်းရွက်တွေ (ဥပမာ-ဆလတ်ရွက်၊ ဂေါ်ဖီ၊ ဟင်းနုနယ်)၊ ပဲပိစပ်နဲ့ တိုဟူး၊ နှမ်းစေ့၊ ဂုန်လျော်စေ့လို အစေ့အဆန် အမျိုးမျိုးနဲ့ ဗာဒံစေ့လို အခွံမာသီးတွေ စားသုံးရပါမယ်။ ဗီတာမင် D အားဖြည့်ထားတဲ့ ထုတ်ကုန်တွေကိုလည်း စားသုံးရပါမယ်။

(၅) Essential Fatty Acid

ငါးနဲ့ ကြက်ဥအမျိုးမျိုး တိရိစ္ဆာန်မှ ရရှိတဲ့ အစားအစာတွေကို မစားသုံးတာကြောင့် Essential Fatty Acid အထူးသဖြင့် အိုမီဂါ-၃ ချို့တဲ့နိုင်ပါတယ်။ အိုမီဂါ-၃ များစွာပါတဲ့ ကယ်လိုလာအဆီ၊ ပဲပိစပ်ဆီ၊ သစ်ကြားသီးတွေ စားပေးပါ။

(၆) အိုင်အိုဒင်း

သက်သတ်လွတ်အစားအစာတွေဟာ အိုင်အိုဒင်းဓာတ် လျော့နည်းတတ်တဲ့အတွက် အိုင်အိုဒင်းဆားကို အသုံးပြုပါ။

Credit : ဒေါက်တာခင်မိုးမိုး

သင်သိလိုသမျှ ကျန်းမာရေးမေးခွန်းများနှင့် ပတ်သက်၍ Healthcare.com.mm ၏ hotline နံပါတ် 7887 သို့ MPT မိုဘိုင်းလ်ဖုန်းဖြင့် ၂၄ နာရီ အချိန်မရွေး  ခေါ်ဆိုပြီး ဆရာဝန်များနှင့် တိုက်ရိုက်ဆွေးနွေးတိုင်ပင်နိုင်ပါပြီရှင်။