ဝက်ခြံရောဂါအတွက်မှာကြားချက် အနှစ်ချုပ်

ဝက်ခြံနှင့် ပတ်သက်သည့် ဗဟုသုတများကို အခြေခံ၍ လွယ်ကူရှင်းလင်းစွာ နားလည်စေရန်နှင့် လိုရင်းတိုရှင်း မှတ်မိစေရန် အတွက်
ဆောင်ရန်ရှောင်ရန် များကို အောက်ပါအတိုင်း စုစည်း တင်ပြအပ်ပါသည်။

၁။ နံနက်အိပ်ရာထ မျက်နှာသစ်လျှင် ဝက်ခြံကိုညှစ်ခြင်း၊ ကိုင်တွယ်ဖြေရှင်းခြင်း မပြုလုပ်ရပါ။ လက်သည်းရှည်ဖြင့် ကိုင်တွယ်မိပါက ပိုဆိုးတတ်ပါ၍ လက်သည်းကို တိုတိုညှပ်ထားလျှင် ပိုကောင်းပါသည်။

၂။ မျက်နှာကို အဆီပြန်ခြင်း သက်သာစေရန်နှင့် ရောဂါပိုးများ ကင်းစင်စေရန် ဆပ်ပြာဖြင့် တစ်နေ့လျှင်သုံးကြိမ် မျက်နှာသစ် သန့်စင်ပေးပါ။

၃။နံနက်ခင်း နေရောင်ခြည်တွင် တစ်နေ့မိနစ်၃၀ခန့် လမ်းလျှောက်ခြင်း၊ လေ့ကျင့်ခန်း
ပြုလုပ်ခြင်းတို့ိကို လုပ်ပေးပါ။ နေ့လယ်ဘက်နေရောင်ခြည်ထဲ သွားလျှင် ခရမ်းလွန်ရောင်ခြည်နှင့် ထိတွေ့မှုမှ လျော့နည်းစေရန် ထီး၊ဦးထုပ် စသည်တို့ ကို ဆောင်ထားသင့်သည်။

၄။ ရေများများသောက်ခြင်း၊ သဘာဝသစ်သီးဖျော်ရည်(ဥပမာ - သံပရာရည်၊ လိမ္မော်ရည်၊ နာနတ်ရည်) များတတ်နိုင်သ၍သောက်ပေးပါ။

၅။ ထမင်းစားတိုင်း ဟင်းရွက်အစိမ်းတစ်မျိုးမျိုး စားဖြစ်အောင်ထည့်စားပါ။ မစားဖြစ်ပါက ကလိုရိုဖီးလ် ပါဝင်သော သဘာဝဆေးတစ်ခုခု ဥပမာ- ရေညှိစိမ်း (chlorella) ၊ အာလ်ဖာဖာ (alfalfa|)၊ ဂျုံမြက်နု(whealgrass) ကြိုက်ရာ တစ်ခုခုကို နေ့စဉ် စားနိုင်ပါသည်။

၆။ အဝါရောင်ရှိသော သစ်သီးသစ်ဥများ- ဥပမာ သရက်သီး၊ ရွှေဖရုံသီး၊ ကန်စွန်းဥနီ၊ မုန်လာဥနီတို့တွင် ဘီတာကယ်ရိုတင်း ကြွယ်ဝစွာပါသဖြင့် တစ်ပတ်တွင် နှစ်ကြိမ်ခန့် အနည်းဆုံုး စားပေးသင့်သည်။ အကယ်၍ မစားနိုင်ပါက ကယ်ရိုတင်း သို့မဟုတ် ကယ်ရိုတီးနွိုက် ပါဝင်သော သဘာဝဆေးများကို မှီဝဲနိုင်ပါသည်။

၇။ အနီရောင်ရှိသော သစ်သီးများတွင် လိုက်ကိုပင်း ( Lycopene) ကြွယ်ဝစွာ ပါသဖြင့် တစ်ပတ်လျှင် နှစ်ကြိမ်ခန့်စားသင့်ပါသည်။ ဥပမာ- ခရမ်းချဉ်သီး၊ ဖရဲသီး၊ စတော်ဘယ်ရီ၊ ဘယ်ရီသီးများ၊ စပျစ်သီးအနီများ။

၈။ သွပ်ဓာတ်များများပါဝင်သည့် အခွံမာအသီးများ၊ အစေ့အဆံများကိုလည်း အလျဉ်းသင့်သလို စားသင့်ပါသည်။

၉။ ခရိုမီယမ်ဓာတ်ကြွယ်ဝသည့် ကြက်သွန်နီ၊ ကြက်သွန်ဖြူ၊ အာလူး စသည်တို့ကိုလည်း ဟင်းရံအဖြစ် မကြာမကြာ စားပေးသင့်ပါသည်။

၁၀။ အိုင်အိုဒင်းဓာတ်ပါသော အစားအစာမျာဖြစ်သည့် ပင်လယ်စာ၊ ရေမှော်၊
ကျောက်ကျော စသည်တို့ကို ဝက်ခြံပေါက်နေစဉ် ရှောင်သင့်သည်။

၁၁။ အိမ်သုံးဆား အထူးသဖြင့် အိုင်အိုဒင်းဓာတ် ဖြည့်စွက်ထားသောဆားကို ဝက်ခြံပေါက်နေစဉ် မစားသင့်ဘဲ ပျောက်မှသာ ပြန်စားသင့်ပါသည်။

၁၂။ စားသုံးဆီကိုတတ်နိုင်သလောက်လျှော့စားသင့်သည်။ အထူးသဖြင့် ပြည့်ဝဆီ များစွာပါဝင်သည့် စားအုန်းဆီနှင့် ဝက်သားကို အထူးရှောင်ကြဉ်သင့်သည်။

၁၃။ ငါးမျိုးစုံကို ကြိုက်သလောက်စားနိုင်သည် ငါးတွင်ပါဝင်သည့် အဆီသည် အိုမီဂါ ၃ (Omega -3) ဖြစ်၍ ဝက်ခြံရောဂါ ပျောက်ကင်းရေးအတွက် အထောက်အကူပြုပါသည်။

၁၄။ နွားနို့နှင့် နို့ထွက်ပစ္စည်းများဖြစ်သည့် ထောပတ်၊ မလိုင်၊ ဒိန်ခဲ၊ စသည်တို့ကို ဝက်ခြံပေါက်နေစဉ် ရှောင်သင့်သည်။ ပျောက်လျှင် ပြန်စားနိုင်သည်။

၁၅။ အချိုဓာတ်များသော သရေစာများ၊ အချိုရည်များကို ရှောင်သင့်သည်။

၁၆။ ဆီးချိုရောဂါသည်များ ဝက်ခြံပေါက်လျှင် ပို၍ဆိုးဆိုးဝါးဝါးဖြစ်တတ်သဖြင့် ဆီးချိုရောဂါကို သေသေချာချာ ကုသမှုခံယူသင့်သည်။ဆီးချိုကို မထိန်းနိုင်လျှင် ဝက်ခြံမပျောက်သည့်အပြင် ပို၍ဆိုးလာတတ်ပါသည်။

၁၇။ စိတ်ဖိစီးမှုကို တတ်နိုင်သလောက်လျှော့ရန်လိုသည်။တရားထိုင်ခြင်းသည် များစွာအကျိုးရှိပါသည်။

၁၈။ ကော်ဖီ၊လက်ဘက်ရည် စသည့်ကဖင်း( caffeine) ဓာတ် များစွာပါသော အစားအသောက်များသည် ဝက်ခြံကို ပိုမို ဆိုးဝါးစေနိုင်သဖြင့် ရှောင်သင့်သည်။

၁၉။ နိုင်ငံခြား ဝက်ခြံပျောက်ဆေးများ (လိမ်းဆေး၊ သောက်ဆေးအားလုံး)ကို အသုံးပြုမည်ဆိုပါက တတ်ကျွမ်းနားလည်သောဆရာဝန်နှင့်တိုင်ပင်ပြီးမှသာ အသုံးပြုရန်နှင့် ညွှန်ကြားချက်အတိုင်း တိတိကျကျ လိုက်နာဆောင်ရွက်ရန် ဖြစ်သည်။

အထက်ဖော်ပြပါအချက်များသည် ဝက်ခြံရောဂါကာကွယ်ရေးအတွက်ရော ကုသရေးအတွက်ပါ အရေးပါသော အချက်များ ဖြစ်ပါ၍ လိုက်နာကျင့်သုံးခြင်းဖြင့် ဝက်ခြံရောဂါမှ ကင်းဝေးစေရန် ဆန္ဒပြုအပ်ပါသည်။

Credit : ဒေါက်တာခင်မောင်လွင် (FAME)

သင်သိလိုသမျှ ကျန်းမာရေးမေးခွန်းများနှင့် ပတ်သက်၍ Healthcare.com.mm ၏ hotline နံပါတ် 7887 သို့ MPT မိုဘိုင်းလ်ဖုန်းဖြင့် ၂၄ နာရီ အချိန်မရွေး  ခေါ်ဆိုပြီး ဆရာဝန်များနှင့် တိုက်ရိုက်ဆွေးနွေးတိုင်ပင်နိုင်ပါပြီရှင်။