ကျန်းမာရေးနှင့်ညီညွတ်စွာ စားသောက်ခြင်း

၁။ ကျန်းမာရေးနဲ့ညီညွတ်တဲ့ စားသောက်မှုပုံစံဆိုတာက မိမိကြိုက်နှစ်သက်တဲ့ အစားအစာတွေကို အလွန်အကျွံစားသောက်တာ၊ ဒါမှမဟုတ် ရှောင်ကြဉ်ကန့်သတ်တာမျိုးမဟုတ်ဘဲ အာဟာရပြည့်ဝမျှတစွာနဲ့ နည်းလမ်းမှန်ကန်စွာ စားသောက်တတ်တာကို ဆိုလိုပါတယ်။ အာဟာရပြည့်ဝမျှတစွာ စားသောက်ဖို့ အရိုးရှင်းဆုံးနည်းလမ်းမှာ ကစီဓာတ်၊ အဆီဓာတ်၊ အသားဓာတ်၊ သစ်သီး၊ ဟင်းသီးဟင်းရွက်၊ ဗီတာမင်နဲ့ သတ္ထုဓာတ်တွေကို အချိုးကျမျှတစွာ ပါဝင်အောင် စားသောက်တာဖြစ်ပါတယ်။ 

၂။ မျှတမှန်ကန်တဲ့ စားသောက်မှုပုံစံဟာ သွေးတိုး၊ နှလုံး၊ ဆီးချို၊ ကင်ဆာ စတဲ့ရောဂါဆိုးဖြစ်နိုင်ခြေလျော့နည်းစေတဲ့အပြင် ကိုယ်ခံစွမ်းအားတိုးတက်မှု၊ မှတ်ဉာဏ်တိုးပွားမှုနဲ့ စိတ်ကျေနပ်မှုတို့ကိုလည်း ရရှိစေနိုင်ပါတယ်။ ကျန်းမာရေးနဲ့ညီညွတ်တဲ့ စားသောက်မှုပုံစံကိုရရှိဖို့ အောက်ပါလမ်းညွှန်ချက်တွေကို လိုက်နာသင့်ပါတယ်။

(က) ကျန်းမာရေးနဲ့ ညီညွတ်သည့် ကစီဓာတ်များစားသုံးခြင်း 

          (၁) ပေါင်းစည်းကစီဓာတ်များ (Complex Carbohydrate) (ဥပမာ - ကောက်ပဲသီးနှံ၊ ဂျုံ၊ ပြောင်း၊ ဆန်၊ ဂျုံကြမ်းနဲ့ပြုလုပ်ထားတဲ့ ပေါင်မုန့်၊ ကွေကာအုတ်၊ ပဲပြားနဲ့ ပဲအမျိုးမျိုး) တို့က ကျန်းမာရေးအတွက်ကောင်းတဲ့ ကစီဓာတ်တွေဖြစ်ပြီး အများဆုံး စားသုံးသင့်ပါတယ်။ 

          (၂) ရိုးရိုးကစီဓာတ်များ (Simple Carbohydrate) (ဥပမာ - သကြား၊ ပျားရည်၊ အချိုရည်မျိုးစုံ) တို့က သွေးတွင်းသကြားဓာတ်ကို မြင့်လွယ်နိမ့်လွယ်ဖြစ်စေပြီး ထိန်းညှိနိုင်စွမ်းနည်းတာကြောင့် ဆိုးတဲ့ ကစီဓာတ်တွေအဖြစ် သတ်မှတ်ထားပြီး မကြာခဏ စားသုံးဖို့ မသင့်တာဖြစ်ပါတယ်။

(ခ) ကျန်းမာရေးအကျိုးပြုအဆီဓာတ်များ ရွေးချယ်စားသုံးခြင်း 

          (၁) မပြည့်ဝဆီတွေ (Unsaturatedfatty Acid) ပါဝင်တဲ့ မြေပဲဆီ၊ သံလွင်ဆီ၊ အခွံမာသီးတွေကရတဲ့အဆီ၊ အစေ့အဆန်တွေ၊ ထောပတ်သီး၊ ငါးအမျိုးမျိုး၊ ငါးသေတ္တာငါး၊ ပင်လယ်ငါး၊ ငါးသလောက်၊ ငါးကွန်းရှပ်နဲ့ ပင်လယ်စာတွေမှာ သွေးအတွင်းအဆီဓာတ်ပြောင်းလဲမှုကို ထိန်းညှိပေးပြီး သွေးခဲမှုအန္တရာယ်တို့မှ ကာကွယ်စေတာကြောင့် မကြာခဏစားသုံးသင့်ပါတယ်။ 

          (၂) ပြည့်ဝဆီတွေ (Saturated fatty acid) ပါဝင်တဲ့ တိရစ္ဆာန်အဆီတွေ၊ စားအုန်းဆီတွေ ပြုပြင်စီမံတဲ့အဆီတွေ (ဥပမာ - မာဂျရင်း၊ ကိတ်မုန့်မှာပါဝင်တဲ့အဆီ) နဲ့ ပြန်လည်အသုံးပြုထားတဲ့ ပြန်ကြော်ဆီတွင်း သွေးပျစ်မှု၊ သွေးခဲမှုတို့ကိုဖြစ်စေပြီး နှလုံး၊ သွေးတိုးရောဂါတွေကို ဆက်လက်ဖြစ်ပွားစေတဲ့အတွက် တတ်နိုင်သမျှ လျှော့စားသင့်ပါတယ်။

(ဂ) အသားဓာတ်ပါဝင်စေခြင်း 

          (၁) သန့်ရှင်းလတ်ဆတ်တဲ့ ငါး၊ ကြက်သား၊ ဥတွေ စတာတို့ကို တစ်ပတ်ကို နှစ်ကြိမ် ဒါမှမဟုတ် သုံးကြိမ်လောက်မျှတစွာ စားသုံးသင့်ပါတယ်။ 

          (၂) သက်သက်လွတ် စားသုံးတယ်ဆိုပါက ပဲအမျိုးမျိုး၊ အခွံမာသီး၊ အစေ့အဆန်၊ တို့ဟူး စတာတို့ကို စုံလင်စွာ စားသုံးပါက အသားဓာတ်ရရှိနိုင်ပါတယ်။

(ဃ) အရောင်အသွေးစုံလင်တဲ့ အသီးအနှံနဲ့ ဟင်းသီးဟင်းရွက်မျိုးစုံတို့ကို များများစားသုံးတာ၊ အရောင်အသွေးစုံလင်ပြီး လတ်ဆတ်သန့်ရှင်းတဲ့ သစ်သီးဝလံ၊ ဟင်းသီးဟင်းရွက်တွေရဲ့ အာဟာရတန်ဖိုးကောင်းတွေဖြစ်တဲ့ ဗီတာမင်ဓာတ်တွေ၊ သက်ဆောင့်ဓာတ်၊ သတ္ထုဓာတ်၊ ဓာတ်တိုးဆန့်ကျင်ပစ္စည်းတွေနဲ့ ကယ်လိုရီဓာတ်နည်းတာကြောင့် နေ့စဉ်နေ့တိုင်းထည့်သွင်းစားသုံးသင့်ပါတယ်။

Credit : ဒေါက်တာလွင်သန့်

သင်သိလိုသမျှ ကျန်းမာရေးမေးခွန်းများနှင့် ပတ်သက်၍ Healthcare.com.mm ၏ hotline နံပါတ် 7887 သို့ MPT မိုဘိုင်းလ်ဖုန်းဖြင့် ၂၄ နာရီ အချိန်မရွေး  ခေါ်ဆိုပြီး ဆရာဝန်များနှင့် တိုက်ရိုက်ဆွေးနွေးတိုင်ပင်နိုင်ပါပြီရှင်။