အခမဲ့ ဆေးကုသပေးမည်

 ပဲခူးတိုင်းဒေသကြီး ညောင်လေးပင်မြို့နယ် ပြွန်တန်ဆာမြို့ရှိ သီတဂူစက္ခုဒါန ဆေးရုံ၌ ဇမ္ဗူအေးတောရ(အင်းဝိုင်း) ဆရာတော်၏ ဦးဆောင်မှုဖြင့် စင်ကာပူ၊ မလေးရှား၊ သြစတြေးလျနှင့် ပြင်သစ်နိုင်ငံတို့မှ ဆရာဝန်ကြီးများ ပါဝင်သော HUMANITARIAN WITH  LOVE အဖွဲ့က အခမဲ့ဆေးကုသပေးမည်ဖြစ်သဖြင့်  လူနာစာရင်း စတင်ကောက်ယူလျက် ရှိကြောင်း သိရသည်။

နိုင်ငံခြားမှဆရာဝန်ကြီးများ ပူးပေါင်းပြီး အခမဲ့ကုသပေးမည့် ရောဂါများမှာ မျက်စိ(အနီး/အဝေး) ပါဝါတိုင်းခြင်း၊ နေကာမျက်မှန်များ ပြုလုပ်ပေးခြင်း၊ အရေပြားနှင့် အထွေထွေရောဂါများ ကုသပေးခြင်း၊   သွားနုတ်ခြင်း၊ သွားဖာခြင်း၊ သွားကြေးချွတ်ခြင်း၊ တရုတ်ရိုးရာအပ်စိုက်၊ စုပ်ခွက်ကပ်၊ အဆိပ်ထုတ်ကုသခြင်းများ ပါဝင်ကာ မတ် ၃ဝ ရက်မှ ဧပြီ ၁ ရက်အထိ သုံးရက်တိုင်တိုင် ကုသပေးမည်ဖြစ်သည်။

ကုသပေးရာတွင် သွားရောဂါလူနာ ၁ဝဝဝ ဦး၊ မျက်စိရောဂါလူနာ ၁၂ဝဝ ဦး၊ အရိုး/အကြော(တရုတ်တိုင်းရင်းဆေးဖြင့်) လူနာ ၁ဝဝဝ ဦးနှင့် အထွေထွေရောဂါ လူနာ ၂၅ဝဝ ဦး ကန့်သတ်ထားသည့်အတွက် မတ် ၅ ရက်မှ ၂ဝ ရက်အထိ ရုံးချိန်အတွင်း ကြိုတင်စာရင်း ပေးနိုင်ကြောင်း သိရသည်။

Credit : မြဝတီ